Vittus: Kingaannerusumik namminersuleriartulerpugut
- Uani ataatsimeersuarnermik naalagaaffinngoriartornissap qanoq ilusilimmik suliarinissaa Siumumit nukingerfigineqannginnissaa siunnerfigineqartoq erseqqarippoq, Vittus Qujaukitsoq oqarpoq, nangipporlu:
- Nukingiussisoqannginnissaa taanna siunnerfigineqarpoq. Kisianni imatut paasinngilara sulineq arriitsumik ingerlassasoq.
Sukkanerpaamilli naalagaaffinngornissaq siunertarinnginnerarpaa, suliassaqarfiilli nunatsinnut tunngasut, maannali Danmarkimit isumagineqartut, nammineerluta akisussaaffigilissagivut pingaartillugu.
Namminiilivinnissaq ullulerneqassanngitsoq Siumup ataatsimeersuarnerani amerlanerussuteqartut aalajangerpaat, tassami susassaqarfiit, maanna Danmarkimit isumagineqartut, nunatta akisussaaffigilerpagit qanoq kinguneqarumaassanersoq nalunarmat.
Tamannali sukkanerpaamik paasiniarneqartariaqartoq Vittus Qujaukitsoq isumaqarpoq.
Nunatta siunissaa nunatsinnilu atugassarititaasut kalaallit ilusilersortariaqaraat, Vittus Qujaukitsoq aama isumaqarpoq.
- Aalisarneq ullumikkut inuussutissarsiutitta pingaarnersaat taassumallu tulliatut oqaatigineqarsinnaalluni aatsitassarsiorneq. Takornariaqarneq inuussutissarsiutitut suli annertusarneqassasoq aamma nunami suliffiit piorsaaffigineqassasut, Vittus Qujaukitsoq oqarpoq.