Kineserit atornerlugaasarput
Kina-miut nunaannarmiut millionilikkuutaat illoqarfissuarni suligaangamik atornerlunneqarujussuartartut Amnesty International nalunaarpoq.
Immikkoortitaasarput innuttaasutullu nalikinnerusutut isigineqartarlutik.
Sulisartut nunaannarmiut illoqarfinnut suliartorsimanngitsuuppata Kina-p aningaasarsiornikkut siuariartulernera pisimanavianngikkaluarpoq. Illorsuit portusoorsuit tuusintilikkaat, biilertunut aqqusinersuit, suliffissuit mittarfiillu nunaannarmiunik akissarsiakitsunik sulisoqanngippat pilersinneqarsimanavianngikkaluarput. Uagullu Kina-miut tunisassiaannik pisisinnaassanngikkaluarpugut. Illoqarfinnulli suliartortut inussiaatitupajaaq pineqartarput. Sivisunerusumik sulisoriniarlugit akissarsiassaasa ilaat sulisitsisunit tigummiinnarneqartarput.
Nunaannarmiut suliffissaqarumallutik illoqarfinnut nuuttarput aammami akissarsiat illoqarfinni qaffasinnerusarput. Ukiut kingulliit 20-t ingerlaneranni Kinamiut 200 millioninik amerlassusillit nunaannarmiit illoqarfinnut nuussimapput. Kisianni nunaannarmiut illoqarfimmiunit appasinnerusutut isigisaapput aamma pisinnaatitaaffikinnerupput.
Kina-mi innuttaasut marlunnut immikkoortillugit nalunaarsorneqartarput, tassa naasorissaasutut imaluunniit illoqarfimmiutut nalunaarsorneqartaramik. Naasorissaasut illoqarfinni suligaangamik pisinnaatitaaffeqanngillat inissaqartitaanissamut, nakorsamit ikiorneqarnissamut, meerartaasaluunniit atuartitaanissaat pisinnaatitaaffiungilaq. Tamatuma kinguneranik nunaannarmit nuuttut appasinnerusutut isigineqartarput sulisitsisunillu akilernerlugaagajullutik.
Siorna illoqarfiit pingaarnersaanni Beijingimi kommunip nunaannarmit nunasisut meeraasa atuarfii 239-t akuerisaanngitsut matoorarpai.
Pisortatigoortumik nunaannarmiut piffissami aalajangersimasumi sulinissamut akuerisaasarput, ikittuinnaalli taamaaliortarlutik, atugassarititaasullu ajornerusarput.
Amnesty Internationalimit Kina-mi naalakkersuisut qinnuigineqarput illoqarfinnut suliartortunut atugassarititaasut pitsanngorsaavigeqqullugit. 2015-imi Kina-mi nunaannarmiut 300 millioninik amerlassusillit nunaannarmiit illoqarfinnut nutsersimassapput. Kisianni ammip qalipaataanik immikkoortitsinertut ittumik pineqaannarunik eqqissiviilliulernissaat ernummatigineqarsinnaavoq.
