Kinap USA-p aallartitaa Hongkong pillugu inatsit oqaloqatiserigaa
Amerikap inatsisartuisa inatsit Hongkongimi tamat oqartussaaqataanerannik tapersersuisunut tapersiisoq akuerereeraallu Kinap nunanut allanut tunngasunut ministereqarfiata USA-p Kinami aallartitaa oqaloqatiseraa.
USA-p Kinami aallartitaata, Terry Branstadip, nunanut allanut tunngasunut ministerimut tullersorti, Zheng Zeguang, oqaloqatigimmagu ilisimatinneqarpoq, inatsit taamaatinngippassuk USA-p inatsimmik atuutilersitsinerata kinguneri tamaasa akuerisariaqarai.
Hongkong Kinap ilagimmagu Hongkongimi pisut Kinamit taamaallaat akisussaaffigineqarmata USA-mit akuliuffineqartariaqanngitsut, Zhengip erseqqissaatigaa.
Kina: Pinerluttunut qujanarniarneq
- Inatsisinik nunani tamalaani atuuttunik ileqqunik nunanut allanut atassuteqarnermut pingaarutilinnik unioqqutitsilluinnarneruvoq. Tamanna Kinap assuarilluinnaraa, Kinap naalagaaffiata nutaarsiassaqartitsivia Xinhua naapertorlugu Zheng ataatsimiinnermi taama oqarpoq.
Kinap nunanut allanut tunngasunut ministeriata, Wang Lip, inatsit pinerluttunut nakuusertartunut qujanarniutaanerarnikuuaa.
Inatsit taanna Kinami pisunut akuliunnermut tunngaviusoq erseqqippoq, Wang USA-p inatsisartuisa inatsit sapaatip-akunnerata matuma siorna akuerereeraallu taama oqarpoq.
Donald Trumpilli inatsit taanna aatsaat atsioreerpagu atuutilissaaq.
Atorfilittanik pillaaneq
USA-p Hongkongimi naalakkersuisut niuernermut immikkut ittumik isumaqatigiissusiornissanut Hongkong naammattunik nammineq naalakkersuisuutitaqarneranik ikinnerpaamik ukiumut ataasiarluni nakkutilliivigisassagaa, Amerikap inatsisiliaani ilaatigut allassimavoq.
Hongkongimilu atorfilittat inuit pisinnaatitaaffiinik unioqqutitsisimasut pillarneqartassasut inatsimmi aamma allassimavoq.
Inatsit pineqartoq Hongkongimi akerliusut politiillu eqqissiviilliuleruttorneranni atuutilersinneqarpoq.
- Hongkongimi uivernersuaqalersitsiniarsarinera aalakkaaneranillu ingerlalluarneranillu ajalusoortitsiniarsarinera iluatsinnavianngitsoq, nunanut allanut tunngasunut ministerimut tullersortip Zhengip USA-p aallartitaalu ataatsimiinnerminni oqaatigaa.
