Nipi immiussaq tv-qarfiup Kringvarp Føroyap tigummisaraa. Immiussalli saqqummersinneqarnissaat inerteqqutigineqarpoq.Assi: Anton Gundersen Lihn

Kinap Savalimmiut Huawei-imut isumaqatigiissuteqarnissamut siorasaaraa

Berlingskep allaaserisaa naapertorlugu savalimmiormiut Huawei-imut isumaqatigiissuteqanngippata niuernissamut isumaqatigiissuteqarnissaq unitsiinnarneqassasoq kinap aallartitaata Savalimmiut siorasaarpaa.

Savalimmiormiut attaveqaatit pillugit suliffeqarfiutaat Føraya Tele suliffeqarfimmut Huawei-imut isumaqatigiissuteqarniarpata taava Kina Savalimmiullu killilersugaanngitsumik niueqatigiinnissamut aamma isumaqatigiissuteqarsinnaapput. Taamaattoqanngippallu savalimmiormiut isumaqatigiissuteqarnissaq puiguinnarsinnaavaat.

Tamanna nipimi immiussamiittoq Berlingskep paasivaa. Berlingskelli immiussaq tusarsimaneraa allassimanngilaq.

Nipi immiussaq tv-qarfiup Kringvarp Føroyap tigummisaraa. Kringvarpip immiussaq nutaarsiassanik aallakaatitsinermi sapaatip akunnerata siuliani saqqummersinniaraluarpaa, aallakaatitsinissamulli minutsit 22-nnanngortut Torshavnimi eqqartuussivimmit eqqartuussisoq immiussanik atuinissamut inerteqquteqarpoq.

Immiussat taamaalillutik tamanut saqqummersinneqanngillat.

Huawei-imut atatillugu perulluliorneq

Berlingskep allaaserisaa naapertorlugu Føroya Telep pisiortorfinnik aalajangiinissaanut savalimmiormiut naalakkersuisuisa siulittaasuat Bárður Nielsen akuliunniannginnerartoq nipimi immiussami tusaaneqarsinnaavoq.

AAMMA ATUARUK Savalimmiuni nutaarsiassaqartitsivik immiussamik isertortumik saqqummersitseqqusaanngitsoq: - Nalorningaatsiarpunga

Illersornissamut ministereqarfiup Huawei-ip 5G-mut attaveqaatinik pilersuisunngortinnissaata toqqarneqarnissaa pitsaanerpaanavianngitsoq oqaatigisimagaa danskit nunanut allanut tunngasunut ministereqarfiata Savalimmiuni naalakkersuisunut oqaatigisimavaa immiussami aamma tusaaneqarsinnaasoq Berlingskep ilanngullugu allaaseraa.

Huawei-ip 5G-mik attaveqaateqarnermut pisiortorfittut atorneqarnera politikikkut suliani ukiuni kingullerni akunnattuussutaavoq. Huawei-ip atortorissaarutai kinamiut naalakkersuisuisa atorsinnaasaannik atortorissaaruteqarnerarlugit USA-p pasilliutiginikuuaa.

Aallartitaq oqaasissaqanngitsoq

Taamaammat USA-p iligisani tamarmik attaveqaqatigiinnermut Huawei-imit atuinaveersaartinniarsarai.

Tuluit Nunaanni Tysklandimilu naalakkersuisut Huawei-imik 5G-nut attaveqaatinut attaveqaatiniluunniit nunani taakkunani atuinnginnissamut ilaatigut mianersoqqussuteqanngikkunik inatsisinik siunnersuuteqarput.

AAMMA ATUARUK Savalimmiormiut Huaweimut oqallisaangaatsiartumut qaninniartut

Danmarkimi TDC-p Huawei atorunnaarlugu Ericsson 5G-mut attaveqaatilioqatigaa.

Huawei-ip amerikamiut isornartorsiuinerat itigartitsissutigaa, suliffeqarfillu kinami naalakkersuisunut attaveqannginnerarlugu.

Berlingskep kinamiut aallartitaat immiussap imarisaanut atatillugu oqaaseqartissinnaasimanngilaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat