Kinap sakkutuui Taiwanip nakkutigisaanut aatsaat taama amerlatigisut isaasut Taiwanimit nalunaarutigineqartoq

Kinap sakkutuuisa timmisartui malersuutit timmisartuaqqallu inuttaqanngitsut katillugit 71-it Taiwanip sakkutuuisa silaannarmi nakkutigisaanut ullup unnuallu kingulliup ingerlanerani isaapput.

Taiwanip illersornissamut ministereqarfia ataasinngornermi taama paasissutissiivoq.

Kinamit Taiwanip nakkutigisaanut aatsaat taama isaasoqartigaaq.

Kinap sakkutuui saassussinermik Taiwanip eqqaata imartaani qulaatalu silaannaani sapaatiummat sungiusartut, Kinap oqartussaasui oqarput.

Kinamiut naapertorlugit, sungiusarnerit Taiwanimit USA-miillu perulluliortitsiniarnermut akissutaapput.

Kinap sungiusarnermini silarsuup ilaani eqqissisimanermik akornusersuiniarnini Taiwanillu innuttaasuinik naalagarsiortitserusunnini takutikkaa, Taiwanip oqartussaasui isumaqarput.

Taiwan Kinap naalagaaffianut atasoq, Kinap oqartussaasuisa aalajangiusimavaat. Taiwanilli nunatut tamat oqartussaaqataanerannik tunngaveqarluni namminersortutut ingerlasup oqartussaasui Kinap isumaanut isumaqataanngilluinnarput.

Timmisartorpassuit saniatigut Kinap sorsuutai umiarsuit arfineq-marluk Taiwanip ungasinngisaani takuneqartut, illersornissamut ministereqarfik paasissutissiivoq.

Kina Taiwanimut ukiuni kingullerni kimigiisernerujartorpoq.

Taiwanimiut eqqissisimanermik kissaateqartut, saassunneqassagunilli imminut illersorniartut Taiwanip naalakkersuisui oqarput.