Kinap nunanut allanut ministeriata Danmarki juulimi tikeraarniaraa

Kinap nunanut allanut ministeriata Wang Yip Danmark, Sverige, Finland Norgelu juulip aappaaniit arfineq pingajuata tungaanut tikeraassavai.

Reutersip nutaarsiassaqartitsivia naapertorlugu kinamiut nunanut allanut ministereqarfia taama paasissutissiivoq.

Ministereqarfik naapertorlugu taassuma nunanut allanut ministereqatini nunani avannarlerniittut naapissavai. 

Nunanut allanut ministerip Lars Løkke Rasmussenip (M) Wang Yi juulip aappaani pingajuanilu ataatsimeeqatigissagaa Danmarkimi Nunanut Allanut Ministereqarfik paasissutissiivoq. 

Pisortatigoortumik ataatsimiissapput sulinermullu atatillugu nereqatigiissallutik.

- Nunarsuarmi ajornartorsiutaanerpaat ilaat aaqqiivigissagutsigit Kina politikkikkut aningaasatigullu qaangiinnassanngilarput.

- Ajunngitsortalimmik ajortortalimmillu Kinamut aningaasatigut atavugut taassumalu tungaatigut oqaluuserisassaqaqaagut, nunanut allanut ministeri Lars Løkke Rasmussen allakkatigut issuaanermi oqarpoq. 

Wang Yip kunngi Frederik aamma naapeqatigissavaa, Nunanut Allanut Ministereqarfik paasissutissiivoq. 

Inuussutissarsiornermut pingaarutilik

Kinap suleqatigineqarnerata danskit inuussutissarsiornerannut pingaaruteqarnera Lars Løkke Rasmussenip ilanngullugu oqaatigaa. Kina “niuerfissuuvoq, danskit tunisassiornerannut aatsitassanik pilersuisoq nutaaliortorlu”, taanna oqarpoq.

- Isumaqatigiinngissutigisagut aamma eqqartortariaqarpagut. Tassani niuernermi politikkip eqqartornissaa Ruslandillu Ukrainemut saassussilluni sorsunnera ammasumik oqaloqatigiissutiginissaa aamma naatsorsuutigaara. 

Sulisitsisut inuussutissarsiortullu kattuffiata Dansk Industrip (DI) Kina naligiimmik suleqatiginerulerusuppaa. 

- Kinap naalakkersuisuisa nunallu avannarliit naalakkersuisuisa oqaluuserisaat tamanna naligiimmik niuerniarsinnaanermut, ersarissumik malitassanut naligiimmillu unammilleqatigiinnermut tunngasuusariaqarput. Nunanut allanut ministeri peqatigalugu maanna toqqaannartumik eqqartorsinnaalerpagut, tamanna DI Global Handel og Investeringimi pisortap Lukas Lausenip allakkatigut oqaatigaa.  

Kinamiit pisortatigoortumik tikeraarnerunngilaq. Taamatut ittumik kingullermik juunimi 2012-mi pisoqarpoq. 

Taamani Kinap præsidenterisimasaa Hu Jintao Danmarkimut tikeraarpoq, taannalu Kinami naalagaaffiup siulittaasuanit Danmarkip pisortatigoortumik tikeraarneqarnerata siullersaraat.

Lars Løkke Rasmussen aamma Wang Yi Kinami illoqarfiit pingaarnersaanni Beijingimi maajimi 2025-mi naapipput. Tamanna Danmarkip Kinallu naalagaaffittut attaveqatigiinnerisa ukiuni 75-inngortorsiorneqarnerannut atatillugu pivoq.  

/ritzau/