Kinap nersornaasiuttagaa Taiwanip præsidentianut tunniunneqassaaq

Eqqissinissamut suliniartunut namminneq nersornaasiisalissallutik, Kinami aalajangersimapput. Taamaaliorput, eqqissinissamik suliniartunut Nobelip nersornaasiuttagaa Oslomi tallimanngorpat, Kinap naalagaaffianik isornartorsiuisartumut tunniunniarneqarnera akerlerigamikku.

Norge taamaaliornissamut mikivallaaqaaq. Kinami pikkorinnneroqaagut. Nersornaasiisartoqatigiinniit taama oqarput tungavilersuutigalugu, Kinami milliardi ataaseq sinnerlugu inoqarmat.

Nersornaasigassat internettikkut qinerneqartassasut, aamma isumaavoq. Nersornaat nutaaq aamma Konfuciusip eqqissinissamut nersornaasiuttagaanik taagorneqartoq, tassanilu naliliisartut arfineq marluupput. Ilaasortalli sisamaannaat aqqi saqqummiunneqarput.

Ukioq mannali internetikkut taasisoqassanngilaq, nersornaat Taiwanimi præsidentimut tullersortasimasumut, Lin Chan-imut, tunniutissallugu naliliisartut aalajangereermata. Taanna Taiwanip Kinallu imminnut qanillattornissaannut suliniarnermi ukiorpassuarni sunniuteqarluarsimavoq.

Kinamiut eqqissinissamik suliniartunut nersornaasiuttagaanik kikkut pilersitsisuunersut ersarluppoq, qaaqqusissutilli Kinap kultureqarnermut ministeriaaniit nassiunneqarput, taamaammallu pisortat pilersitarissagaat ilimagineqarpoq.

Ataaserli nalunanngilaq, eqqinnissamik suliniartunut Nobelip nersornaasiuttagaanik ukioq manna nersornasigaasussaq, Liu Xiaobo, tallimanngorpat Oslomiissanngilaq. Taannami Kinami suli parnaarussaavoq.