Assi: IA Folketingimi

Kinap mittarfiliortiternermut soqutiginninnera ministerip erseqqissumik oqaaseqarfiginngikkaa

Danskit naalakkersuisui Kinap aningaasaleeqataanissaa pinngitsoortinniaannarlugu nunatsinni mittarfiliortiternissamut aningaasalersuiniarnersut arlaleriarlugu apeqqutigineqaraluartoq, danskit aningaasaqarnermut ministeriata siunersiuinermi tamanna erseqqissumik akissuteqarfiginngilaa.

Aningaasaqarnermut ministerip Kristian Jensenip (V) Folketingip Kalaallit Nunaannut tunngasunut ataatsimiititaliaanit siunersuinermut pingasunngormat aggersarneqarnerani tamanna Enhedslistenimit Socialidemokraatinillu arlaleriarlugu apeqqutigineqaraluarpoq.

Apeqquteqartut ilagaat Enhedslistenimeersoq Christian Juhl:

- Kinamiut Kalaallit Nunaannit ingalassimanissaat siunertaralugu danskit naalakkersuisui aningaasaliiniarpat? Imaluunniit mittarfiit tallilerneqarnissaat piviusunngortinneqalerpat Kinamiut issiaqatigisinnaanissaat danskit naalakkersuisuisa takorloorsinnaavaat?

AAMMA ATUARUK Mittarfiliortiternissamik aalajangiineq danskit naalakkersuisuisa akuliuffigisimannginneraraat

Tamannali erseqqissumik akineqanngilaq. Aningaasaqarnermut ministerip erseqqissaatigaa nunatsinni aningaasaliinissaq maannakkorpiaq 'periarfissaalluartoq'. Aamma Danmarkip Nuummi Ilulissanilu milliardinik aningaasaliinissamut soqutiginninnera Kinamiut soqutiginninnerisulli-iinnarpoq: suliniutigineqartoq aningaasatigut akilersinnaassuseqarmat.

- Kinamiut suna pissutigalugu aningaasaliinissaminnut soqutiginnippat? Aap, pissutsit ilaat erseqqinnerulersimapput, periarfissanillu ammaassissoqarluni. Periarfissallu taakkorpiaat pissutigalugit mittarfiliortiternissamik suliniutip peqataaffiginissaata aningaasatigut akilersinnaassuseqarnera danskit tungaannit takusinnaavarput. Ima paasillugu aningaasarsiornikkut imminut napatissinnaavoq, Kristian Jensen siunersiuinermi taama akivoq.

Ministeri: Kina Kalaallit Nunaanni aningaasaliisinnaavoq

Danskit naalakkersuisui - amerikamiut naalakkersuisui assingalugit - Kinamiut ingerlatseqatigiiffiata Kalaallit Airports A/S-imut aningaasaliisuunissaa annertuumik ernumanartoqartillugu oqaatigisimavaat. Danmarkimi USA-lu naapertorlugit Kinap nunatsinni attaveqarnermut piginneqataalernera Kinap nunatsinni malunnaatilimmik pissaaneqalerneranik kinguneqarsinnaavoq.

Danskilli naalakkersuisuisa Kinap mittarfiliortiternermut peqataatitsinaveersaarnera aningaasaqarnermut ministerip siunersiuinerup kingorna illuatungilerpaa.

Aappimik naaggamillu akisinnaaguit: Kinap ingalassimanissaa pillugu taamaaliortoqarpa (danskit naalakkersuisuisa Kalaallit Airports A/S-imut, aaqq.)?

- Ajoraluartumik ima ajornartiginngilaq aappimik naaggamillu akiinnartoqarsinnaalluni. Aningaasalersuinerup eqqortuunera pissutigalugu taama iliortoqarpoq. Kinap ingalassimanissaa siunertarineqanngilaq. Kinap aningaasalersuinissaa ajoriffissaqartinngilarput. Uatsinnulli pingaarutilik tassaavoq attaveqarnikkut suliniutit taama annertutigisut Danmarkimit Kalaallit Nunaannillu isumagineqartariaqarnerat. Tamannalu naleqquttutut isigaarput.

AAMMA ATUARUK Løkkep neqerooruteqarneratigut Kina ingalassimaneqassaaq

Taava Kinap mittarfinnut marluusunut - Nuummi Ilulissanilu - aamma aningaasaleeqataanissaa ajorinngilat?

- Naagga, isumaqarpunga matumani aningaasaliinermi mittarfiit marluusut matussuserneqartut. Aningaasaliisoqaqqinnissaa pisariaqanngilaq. Kinamiut Kalaallit Nunaanni aningaasaliinissamut soqutiginnikkunik, taava neriuutigaara inuussutissarsiutitigut suliniutinut aningaasaleerusussinnaassasut, Kristian Jensen KNR-imut taama oqarpoq.

AAMMA ATUARUK Kangerlussuup mittarfiata siunissaa pillugu USA oqaasissaqartitaasoq

AAMMA ATUARUK Danskit aningaasaliissuteqarnerat Kinamut tunngassuteqarpoq

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat