Kinap Issittumi uuliasiornissaq soqutiginartippaa

Danmark, Rusland aamma USA Issittumi Siunnersuisoqatigiinni aamma ilaasortaapput.

- Issittumi pissutsinut Kinamiut malinnaasorujussuupput soqutiginnillutillu, Norgimiut Issittumi Siunnersuisoqatigiinni ilaasortaatisa ilaat Karsten Klepsvik oqarpoq.

Siunnersuisoqatigiit Norgemi Narvikimi ukiaq ataatsimiimmata Kinamiut peqataatitaqarput, atorfilittat pingasut ataatsimeeqataagamik.

Namminersornerullutik Oqartussat peqataatitaqarput, Aatsitassanullu Pisortaqarfimmi atorfillit ilaat Kinami uuliasioqatigiiffik ataatsimeeqatiginiarlugu Kinamiinnikuullutik.

Issittoq Kinamut pingaaruteqartoq, Danmarkimi Handelshøjskolemi professorip Kjeld Erik Brødsgaardip oqaatigaa, pingaartumik siunissaq eqqarsaatigissagaanni, professori oqarpoq.

Uuliasiorsinnaanissaq pillugu akuersissutinik Kinamiut pisiortulernissaat ilimagineqarsinnaalissaaq ilisimatuut oqarput.

Issittumi Siunnersuisoqatigiit Nuummi ukioq manna maajip qaammataani ataatsimiissapput.

Issittup uuliasiorfiusinnaasutut pingaaruteqariartuinnarnera pillugu Danmark, Norge, Canada, USA aamma Rusland ataatsimiissapput.