Kinap isornartorsiorneqaqattaarnera sunniuteqalerunarpoq
EU-kommissionimi siulittaasoq, Jose Manuel Barroso, Beijingimiittoq oqarpoq ungasinngitsukkut Tibetimi pissutsit pillugit ilorraap tungaanut aallartoqarnissaa ilimagalugu. Barroso ilagisanilu Kinami naalakkersuisut siulittaasuat naapikkamikku Tibetimi pissutsit, Tibetimiullu anersaakkut qullersaannik, Dalai Lamamik atassuteqartannginneq siulliullugit eqqartorpaat. Isumarput ersarilluinnarpoq; Tibetimi pissutsit aaqqissuusaalluartumik ilorraap tungaanut aallarnissaat kissaatigeqaarput, Barroso naqissusiivoq. Taamaalilluni naalagaaffit assigiinngitsut naalakkersuisuisa siulittaasui arlallit taperserlugit. Kinamiut isornartorsiorneqartuarlutik kiisami qisuariarput. Pisortat nutaarsiassaqartitsiviat nalunaarpoq, Dalai Lama siunnersortaalu ulluni qaninnerni saaffigineqassasut. Kinamili pisortat pilersaarutitik ullulernagillu sumi ingerlanneqassanersut oqaatiginngilaat. Tibetimiut nunap avataani naalakkersuisuutitat Indiamiittut nalunaarput suli Kinamiunit saaffiginnissummik tigusaqarsimanatik.
