Kinap Canadallu akornanni pissutsit ajorsiartorput

- Issittup avannaarsua nunarsuarmioqatinut ammaanneqassanngilaq, tamannalu naalagaaffiit issittumiittut arfineq-pingasut issittumi siunnersuisoqatigiinni ilaasortaasut aalajangigassaraat, Canadami ministeriuneq, Stephen Harper, sapaatip-akunnerani kingullermi apersorneqarluni taama oqarpoq.

Issittumi siunnersuisoqatigiinni naalagaaffiit aalajangiisinnaanatik alaatsinaatsutut inissisimasut annertunerusumik sunniuteqarnissaat Stephen Harperip kissaatiginngilaa.

Stephen Harperip taama oqarnera Kinamit isorineqarpoq aalassassutigineqarlunilu.

Aviisi Globe and Mail, Stephen Harperip apersorneqarneranik saqqummiussisoq, Kinami nunanut allanut ministereqarfiup oqaaseqartittagaanit, Hong Lei-imit, e-mail-ikkut nassitippoq. Hong Lei tassani allappoq, Issittumi naalagaaffiit arfineq-pingasut kisimik pineqanngimmata, nunalli issittumiinngitsut aamma pineqarmata. Tassani pineqartut tassaapput silap pissusiata allangoriartornera, nunanili tamalaani umiarsuit aqqutaat aamma pineqarlutik, Hong Lei allappoq.

Tamakkua nunani issittuni aamma nunani issittuniinngitsuni oqaluuserineqartariaqarput, ataatsimoorlutik siuariarnermik angusaqassammata.

Nunat issitumiittut soqutigisaat oqartussaaffiilu ataqqineqartariaqarput, nunalli issittumiinngitsut pisinnaatitaaffii aamma ataqqineqassapput, nunat tamat inatsisiliaat malillugit, Hong Lei oqarpoq. Taanna aamma isumaqarpoq, Canadap taama isummernera naalagaaffiit issittumiittut allat arfineq-pingasut isumaqatiginngikkaat.

Kina Canada-mi ineriartortitsinernik sulianik annikitsunik  marlunnik ingerlataqarpoq,  taamaakkaluartoq Kinap sunniuteqarpallaarnissaa Canadamit qularnartoqartinneqarpoq.