Kinap ammarsinnaassusaa Dalai Lamap nuannaarutigaa
Kina-mi sapaatip-akunnerani kingullermi nunap sajorujussuarnerata kingunerisaanik oqartussat matoqqasutut isigineqartuarsimasut, ilumut ammarsinnaassuseqarnerat takusinnaaleritsik, Tibetip anersaakkut pisortaa, Dalai Lama, Kina pillugu isummersorpoq.
Allattoq Louise M. Kleemann
maajip 22-at 2008 11:27
- Pisut takutippaat Kinap ammasinnaassuseqarnera, Dalai Lama BBC-mit apersorneqarluni oqarpoq.
Kinami oqartussat nunap sajunnerata kingorna tusagassiortunut ammallutik pinerat nuannerluinnartuunerarpaa. Aliasuutiginerarpaali innuttaasut 50.000-it, taakkununnga ilaallutik meerarpassuit, ajunaarsimanerat.
- Meeqqat inuusuttullu ajunaartut eqqaallugit Kinami ataasiinnarmik meeraqaqqusaaneq aliasuutigilersarpara. Angajoqqaat meeraarsertut ila anniaateqassaqaat. Eqqaaginnarlugiit alianaqaaq, oqarpoq.
Dalai Lamap Tibetip namminersulernissaa nuna Kinamit 1950-imili tiguagaammalli sorsuutigaa, innuttaasunilli pinnittarnera assuaralugu.
Dalai Lama-p Kinami oqartussanik juunip qaammataani ataatsimeeqateqarnissaa piviusunngussanersoq suli nalunarpoq.
