Royal Greenlandip qaleralinnik tunisassiornerata ilarujussua Kinamut anngutissaaqAssi: Royal Greenland

Kinamut tunisassiornerup ajutoorujussuarnissaralua Royal Greenlandimit pakkersimaarneqarpoq

Januarimi Royal Greenlandip ernummatigaa, Kinamut tunisassiorneq covid-19 peqqutaalluni akornuserujussuarneqaratarsinnaanera.

Ukioq aallartilaarpoq, killilersuinerillu Royal Greenlandip milliartilikkaanik Kinamut tunisassiorneranut aamma akornusiivoq.

Kinammi covid-19-mut atatillugu malittarisassiai annertupput, tunisassiornerlu unittuujusavissimammat Europami Kinamilu qerititsiviit ulikkaavissimapput, aalisagarpassuillu uninngatinneqaannarlutik.

Royal Greenlandip tunisassiornermut pisortaa Bruno Olesen januarimi oqaaseqarnermini ernummatigaa, pissutsit taamaannerat qaammaterpassuarni suli ingerlagallassasoq, tamannalu ingerlatsivimmut ajunaarutaassaqisoq, naggataatigullu aamma nunatsinni aalisartorpassuarnut kalluaajumaartoq.

Qaleralinnilli tunisaqartoqarallartillugu taamak aamma ajortigisoqanngilaq.

- Sulili killilersuisoqaraluartoq, kisianni takusinnaavarput mianersortunnguamik tunisassiorneq ingerlasoq. Kinap paasisimagunarpaa naalagaaffittut Kinallu iluaniit isigalugu, tunisat Kinamut anngukkaangata qulakkeerinnittumik ilusiliinissaq ammaassivinnissarlu allaqqunneqarsinnaanngitsoq, taanna nassuiaavoq.

AAMMA ATUARUK Kinamut tunisinermi ilungersunartorsiorujussuarneq: Qalerallit raajallu millionikkuutaanik nalillit uninngaannartut amerliartortut

Kommunistit partiiat martsip qaammataani ataatsimeersuartitsimmat Kinami naalakkersuisut nioqqutissanik nunamut eqqussuinissamut ammaapput.

- Sissiukkami utaqqisoqarunnaarpoq, tunisassiortoqaqqilertorpoq aammalu pisiortortoqarluarluni, Bruno Olesen oqarpoq.

Tamanna ingerlalluassangatippisiuk?

- aap, kisianni nioqqutissanik eqqussuisunut (importørinut) aningaasatigut eqquimmat tamanna qulakkeertariaqarpoq, tassami importørit sissiukkami talinnganerminnut akiliisussapput aammalu qerititsivimmiittuuteqarnerminnut aamma akiliisussaapput.

AAMMA ATUARUK Aalisarnermik ingerlataqartut kattuffiat: Kinamut nioqquteqarneq piffissami matumani aarlerinarluinnarpoq

Bruno Olesenip oqaatigerusunngilaa, pissutsit taamaannerat suliffeqarfissuup aningaasartuutigiumaagassaasa avammut saqqummiutinnginnerini Royal Greenlandimut qanorpiaq naleqarsimanersoq

Raajat qaleruallit akii ingerlalluanngillat

Qalerallit tunisaaqqileraluartut, raajat qaleruallit Kinami tunisaanerat killup tungaanut ingerlavoq. Tamannalu pinartuuvoq. 

- Raajat qaleruallit ajornartorsiutaapput, kisianni takusinnaavarput, piumaneqarnerat aamma takkukkiartoqqilersoq, kisianni akiisa ingerlarngi ilungersunarput, Bruno Olesen oqarpoq.

AAMMA ATUARUK Coronamik ajornartoorneq: Royal Greenland ataannarnissamut akiliisinnaassutsiminik qaffaasoq

Ataatsimulli isigalugu Royal Greenlandimi pissutsit atuuttut pinartutut nalilertariaqarput. Ajunaaruteqarujussuarnermiit ajunnginnerulaartumut tassa ajornartorsiuteqarnermut nikeriartoqaannarsimavoq.

- Akit suli appasipput. tamannalu allaqqunneqarsinnaanngilluinnarpoq akinik pitsaanerusunik nioqquteqalissagutta, tamannalu pisinnaavoq aatsaat tuniniakkat pisiaasartullu oqimaaqatigiinnerulerpata.

Ruslandimut USA-mullu tunisassiorneq ilorraap tungaanut ingerlavoq

Royal Greenlandip qullersaqarfiani iliuusissiaanut ilaavoq, tuniniaavinnut annertuunut arlalinnut tunisisalernissaq, taamaalilluni nuna ataaseq iluatsinngikkaangat tamanna tunisassiorfimmut eqqorneqaataasannginniassammat, soorlu Kinami tamanna pisoq.

Periusissiarlu taannaavoq Royal Greenlandip ukiuni arlalinni anguniagaa, taamaammallu aamma tamanna pillugu Amerikap avannaani nioqqutissanik tuniniaanissamut allaffeqarfimmik ammaapput. Januaarimiillu ilorraap tungaanut nikeriartoqarluni.

- USA-mi allaffeqarfiup pisortassaanik atorfinititsivugut, tunisagullu qaffariarput, aammalu tamassuma saniatigut Amerikap avannaani tuniniaanissamut nutaanik periarfissiivugut, taamaalilluta suli annertunerusumik tunisaqarsinnaaniassagatta, Bruno Olesen oqarpoq. 

AAMMA ATUARUK Royal Greenland millioninik annaasaqaraluartoq sinneqartooruteqarnissaq pisortap naatsorsuutigigaa

Taamatuttaaq Royal Greenland russinut tuniniaanissamut aamma sukatereqqipput, tassunga tunngasoq qangali ammut ingerlasimagaluartoq sukateqqillugu, tassami russit raajarniartui namminneq raajarniartarsimammata.

- Taamaalilluta raajanut qalerualinnut pilersaaruterput aamma iluaquserneqassaaq, tassami Ruslandimi raajat qaleruallit assorsuaq piumaneqarluartuupput, Bruno Olesen oqarpoq.

Taassuma aggustimi pissutsit atoruminarnerulernissaat isumalluarfigai aamma raajanut qalerualinnut atatillugu, 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat