Kinamiut saviminissaq Nunatsinniit pisiarerusuppaat

Tuluit aatsitassarsiortitseqatigiiffiata - London Miningip - Nuup Kangerluani Isukasiani misissuinissamut akuersissummik pigisaqartut, Kinami sisaliorfiit aningaasaateqarfiillu arlallit, isumaqatiginialeruttorpaat.
Allattoq Elisa Isaksen
februaarip 10-at 2012 06:38

Suliffeqarfissarsuup ineriartortinneqarnerata pilersaarusiornissaa aningaasatigullu tapersersorneqarnissaa isumaqatigiinniartut qulakkeertussaavaat.

London Mining-imi pisortaaneq Graeme Hossie businessweek.com-imut taama nalunaaruteqarpoq. Pisortaanerup oqaatigaa Nuup kangerluani suliffeqarfissarsuarmut aningaasaliissutissat qallunaat aningaasanngorlugit 12 milliardit koruuniussapput. Saviminissamik piiaanerup 2015-imi aallartinneqarnissaa naatsorsuutigineqarpoq, saviminissanillu 15 millionit tonsinik ukiumut piiaasoqartarnissaa naatsorsuutigineqarluni.

Pilersaarusiornermi suleqatigisassap Sisaleriffimmeersuunissaa pingaaruteqartoq Graeme Hossiep naqissuserpaa. Tassami piiaaffissap inerisarneqarnerani saviminissarsuullu tunineqartussap pisisussaqareernissaa pingaaruteqarmat suleqatigisassaq akiliisinnaassuseqarluartariaqassaaq.

Pappiaranik nalilinnik aktiat nalingii nikisinnagit Londonip børsiani, London Miningermiut qanittukkut aamma tuniniaammata 7 milliardit koruunit isertissimagaat Businessweek.com-ip nalunaarutigaa.