Kinamiut Narsamut aalisakkanik takuniaapput
Kinamiut Narsamut ulluni makkunani tikeraarput aalisakkanillu pisiarisinnaasaminnik misissuillutik. Kinamiunut angalaqataavoq Danmark-mi siunnersuisarfissuarmi Carl Bro-mi avatangiiseq pillugu aalisakkanillu tunisassiornermut siunnersorti, Lars Brünner. Angalaqataavortaaq Kina-p avannaani aalisakkanik tunisassiorfiutilik Chen Wen Wu.
Lars Brünner unnersiortorujussuuvoq oqarluni, takusatik misigisatillu pitsaanerpaajusimasut. Takusinnaanerarpaa aalisakkanik tunisassiornissaminnut periarfissarissaarnissartik aammalu suliffinnik nutaanik pilersitsisoqarsinnaanera.
Lars Brünner aperaara, siunissami aalisakkanik Narsamiit avammut tunisassiulernissaq periarfissaqarsorineraa akivoq, periarfissaqarluarnera qularutissaanngitsoq. Narsamiinnerminnilu suliassarigitsik Kiniserinut suleqatigiinissamik atsioqatigiittoqarnissaa, namminersortunut Royal Greenland-imulluunniit. Atsioqataasut isumagissavaat aalisakkat qanoq aalisarneqassanersut, suliarineqassanersut qanorlu nassiunneqassanersut.
Ilanngullugu oqaluttuaraa Narsap Inuussutissarsiornermik siunnersortaa Karl Høegh, ukiup ataatsip missaa qaangiuttoq radiukkut apersorneqarluni inalugallit pillugi oqaluppaluttoq tusaasimallugu.
-Massakkorpiaq misissukkagut inalualinnut samminerupput, kisianni taakkuinnaanngillat tassami suugaluartulluunniit aalisartut qaqitaat misissorneqarput, aningaasarsiutaasinnaanngitsutullu nalilertareersimasaralugut Kinamiunit assorsuaq soqutigineqarput.
Kina nunarsuup illuaniippit, qanormita ililluni aalisakkat asiutinnagit Kinamut anngunniarneqartassappat?
- Qaleruallit eqqarsaatigalugit pilersaarutigaarput, qalalaariarlugit panertinneqartassasut, qangatut panertitsisaasitoqarput misiliutigeqqaarneqassalluni. Piumaneqarluarpata tunisallu annikigineqarpata panerasuartitsisartunik maskiinanik pissarsiornissarput aalajangiunnikuuarput, Karl Høegh oqarpoq.
Kinamiut Narsamut tikeraartut nutserisuat Chen oqarpoq, aalisakkat tuniassiarineqarsinnaasorpassuit Narsami takusatik Kinamiunit assut soqutigineqartut.
