Kinamiut Isukasia takusareerpaat
Isukasiani aatsitassarsiorfissarsuaq sanaartorfigalugu 2013-mi aallartinneqassaaq qalluinissamut akuersissut Namminersorlutik Oqartussanit tunniunneqassappat. Suliffeqarfissuup naatsorsuutigaa suliffiit 400-ut 500-ullu akornanni pilersinneqassasut aatsitassarsiorfillu sivikinnerpaamik ukiuni qulini ingerlasinnaassasoq naatsorsuutigineqarpoq.
Kinamiut aningaasaliisartut pilersaarutit malillugit ullumi marlunngornermi Nuummiit aallassapput Isukasiani aatsitassarsiorfissaq takuniareerlugu. Saviminissaq Nuup kangerluaniit Kinamut umiarsuarnik assartorneqassaaq savinermillu sanaartorfiit Kinami annertusiartupiloortut utaqqiinnarput saviminissap Nuup kangerluaniit suliarilernissaanut.
Qalluinissamilli qinnuteqaatip Nammininersorlutik Oqartussanit isummerfigineqannginnerani tusarniaanerit ingerlanneqassapput.
Tamanut ammasumik maanna tusarniaanermut atatillugu, nalunaarusiat 'Suliap imminut akilersinnaaneranut naliliineq' aamma 'Avatangiisinut sunniutissanik naliliineq' ilanngussallu tamatumunnga tunngasut ilanngunneqartut kalaallisut qallunaatullu atuarneqarsinnaapput.
Tusarniaassutigineqartut tamarmik Namminersorlutik Oqartussat nittartagaanni www.nanoq.gl- imi atuarneqarsinnaapput.
Tusarniaanermi piffissaq killiliunneqartoq tassaavoq oktobarip 19-iat 2012, tamatumunngalu kikkut tamarmik akissuteqarsinnaasut, Namminersorlutik Oqartussat tusagassiuutinut nalunaarumminni allapput.
Tusarniaanerup nalaani sisamariarluni tamanut ammasumik ataatsimiititsisoqassaaq. Ataatsimiititsinerit taakku sisamat Ilisimatusarfimmi pissapput. Ataatsimiititsineq siulleq aggustip 25-anni pissalluni. Ataatsimiinnerit tamarmik unnukkut arfineq marluniit qulit tungaanut pisassapput.
Nunatsinni suliffeqarfik KompetenceKompagniet kikkunnulluunniit attuumassuteqanngitsumik ataatsimiinnernik aqutsisuussaaq. Suliffeqarfiullu taassuma tusarniaanermi atorneqartussanik, ataatsimiinnerit imaqarniliussavai.
