Kinamiut internetimi kilitsissiaat sorraaligaluttuinnarput
USA-p præsidentiata Obamap Kina sapaatip akunnera kingulleq tikeraaramiuk, internetimi killilersugaanngitsumik oqaaseqarsinnaaneq tapersersorlugu inuusuttut oqalugiarfigai. Shanghaimi inuusuttut nuannapput, Kinamili takuneqarsinnaasut avataanni allanik pisoqarpoq.
Nalunaarusiami nutaami takussuserneqarpoq, amerikamiut isertugaataannik ujaasisarneq Kinamiut internet-ikkut kilitsissiaasa annertusisimagaat. Kilitsissiat sorraalligaluttuinnarlutillu silatusaariallaqqissigaluttuinnartut, USA-mi inatsisartunut siunnersuisartutut ataatsimiititaliaata nalunaarusiamini oqaatigaa.
Interneti atorlugu saassussinerit 2008-mi 50.000-inik amerlanerusut paasineqarsimasut, ukiumullu siulianut sanilliullugu 20 procentimik qaffariaateqartoqarsimasut, amerikamiut sakkutuunut qullersaqarfiata oqaaseqartartuata oqaatigisimagaa nalunaarusiami atuarneqarsinnaavoq.
60 procentimik qaffariaateqartoqarnissaa ukioq manna naatsorsuutigineqarpoq.
Saassussinerit tamakkerlutik Kinamit pisuunngillat, amerlanersaali tassanngaannerlutik. Nalunaarusiarlu 367-inik qupperneqartoq malillugu, Kinap qullersai toqqaannartumik tamatumunnga akuupput. Amerikamiut soqutigisaat aamma inuit Kinamiut isornartorsiuisartut internet-imi kilitsissianit pingaarnertut paasiniaaffigineqartarput.
Sakkutooqarnikkut aningaasarsiornikkullu nunamik pissaaneqarluartumik inerisaanissamut paasissutissanik pissarsinissaq tamatumani siunertarineqartoq nalunaarusiami oqaatigineqarpoq.
Barack Obamap Kinamut inuusuttunullu Shanghaimiittunut tikeraareerluni angerlamut tikinnera nalaarlugu nalunaarusiaq saqqummiunneqarpoq.
Kinamiut Washingtonimi aallartitaqarfiata oqaaseqartartuata pasilliutit tamaasa eqqortuunnginnerarpai sorsunnermillu nillertumik takorluuinertut taallugit.
