Kinamiut cykilerneruleqquneqarput

Silaannaq mingoqaqisoq aqqusinikkullu angallannerujussuaq Kinami illoqarfiit pingaarnersaanni, Beijingimi, innuttaasut qatsulluinnarpaat. Ajornartorsiutilli qaangerniarlugit illoqarfimmi siuttut maanna piumasarinialerpaat Beijingimi innuttaasut 17 millioniusut cykilernerulernissaat.
januaarip 24-at 2010 14:21

Beijingimi innuttaasut 80 procentii assartuissagaangamik ukiut 20-nnaat matuma siorna cykilernerujussuugaluarput. Innuttaasulli atugarissaarnerujartuinnarnerminni biilisisalerput, amerlanerillu maanna biileqartiteramik mingutsitsisorujussuanngorput.

Beijingimi innuttaasut - tassa 17 millioniusut - 25 procentiisa 2015-imi cykilertalernissaat illoqarfimmi siuttut anguniarpaat. Tamanna anguneqarsinnaanerarpaat aqqusinerni cykilertunut aqqutissat sanaartoqqinneqarnerisigut, biilertorpassuaqalermammi tamakku atorunnaarsimammata.

Cykilertoqalernissaata anguniarneqarnerata saniatigut illoqarfimmi siuttut anguniarniarpaat Beijingimi innuttaasut 17 millionit affaasa bussit qimuttuitsut metrollu atornerulissagaat.

Beijingimi biilit 4 millioniupput, aqquserngillu naammanngilluinnarput, biilertullu ullut tamaasa siuleriiaarlutik utaqqerrattariaqartarput, taamaalillutillu suliffimminnut piffissaq eqqorlugu anngunnissaminnut immaqa periarfissaqartarnatik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq