Kinamiut Canadamiut puisinniartarnerat isornartorsiorpaat
Kinamiut atuagassiata, Chinadialoguep, qaammammi uani saqqummernerani allaaserisaqarpoq, Kinamiut uumasunik illersuiniat kattuffii 50-init amerlanerusut Canadamiut puisinniartarnerat isornartorsiorniarlugu suleqatigiissuteqartut.
Chinadialogue atuagassiaavoq Kinamiusut tuluttullu allagaq avatangiisinik sammisaqartartoq.
Europami nunat USA-lu tunisassianik puisineersunik pisiumanngimmata, Canadap tamakkua Kinami maanna tuniniarniarsarai.
Kinamiut qaammatini arlalinni taama isornartorsiuisut tusaareerlugit, Canadap Beijingimi aallartitaa, David Mulroney, akivoq, tunisassiat puisineersut Kinamiut mamarippatigit, tamanna Kinamut Canadamullu iluassasoq.
Uumasunilli illersuiniaqatigiit Kinamiunut tamanna iluannginnerarpaat, puisit qasserpiaanersut ilisimaneqannginnerarlugit, aammalu piniarneq qanoq peqqarniitsigisartoq, filmerpassuartigut videorpassuatsigullu takutinneqartoq. Taavalu aamma isumaqarput, inuit naakkitsaasunik ileqqutoqaqartut, puisinniarneq tamakkunani ilaalluni.
Canadap aalisarnermut ministeria, Gail Shea, tamanut nalunaareerpoq, Canadamiut puisinik tunisassiat Kinamut januaarimiit tuniniarneqalissasut.
Chinadialogue allappoq, Canadamiut puisinik tunisassiaataanik pisinissamik Kinap Naalakkersuisuiniit pisortatigoortumik nalunarummik, Kinamiut uumasunik illersuiniat kattuffii pissarsisinnaasimanngitsut.
Kattuffiit taakkua puisinit tunisassianut akerliunertik tusartinniarlugu iliuuseqalersimapput, ukioq naallugu ingerlasussamik, puiseeqqallu pillugit erinarsuummik saqqummersitsisimallutik.
Canadalli aalisarnermut ministereqarfiata puisinik tunisassianik tuniniaanissartik aallutiinnarpaat, ministereqarfiummi missiliorpaa, Canadap kangimut sineriaani 7 millioninik puiseqartoq.
