Kinamiut isertortumik alapernaarsueqatigiivi kinamiumik australiamiunit kingoqqisumik Australiami inatsisartunut qinersisoqarnissaanut sassartitsinissamut australiamiut aningaasaataannik 1 million dollarinik tassa 4,6 millionit koruuninik neqerooruteqarsimapput.Assi: Thennicke [CC BY-SA 4.0 (https://creativecommons.org/licenses/by-sa/4.0)]

Kinamiut Australiami politikkikkut isertortumik alapernaarsuiniarnerat misissorneqartoq

Australiap ministeriunerata kinamiut inatsisartuni isertortumik alapernaarsuiniartoqarsimanera ernumanartuunerarpaa.

Australiap kinamiut Australiami inatsisartuni isertortumik alapernaarsuiniarsimasinnaanerat misissuiffigaa.

Australiap isertortumik paasiniaasartuisa – ASIO-p tusagassiuutinut qaqutigoortumik nalunaaruteqarnerminni tamanna uppernarsarpaat.

Australiami tv-kkut kanalimi Nine-imi aallakaatitassiami “60 Minutes”-imi suliap sammineqarnerata aqaguani taama nalunaaruteqarput.

Aallakaatitassiaq naapertorlugu kinamiut isertortumik alapernaarsueqatigiivi kinamiumik australiamiunit kingoqqisumik Australiami inatsisartunut qinersisoqarnissaanut sassartitsinissamut australiamiut aningaasaataannik 1 million dollarinik tassa 4,6 millionit koruuninik neqerooruteqarsimapput.

Angut pineqartoq tassaavoq Bo ”Nick” Zhao taanna biilinik inuulluarniutinik Melbournemi tuniniaasuuvoq.

Isertortumik paasiniaasartut suliamik misissuisut

- ASIO-p ilungersunartorujussuartut isigisaa “60 Minutes”-imi sammineqarpoq, isertortumik paasiniaasartuni pisortaq, Mike Burgess nalunaarummi allappoq.

- Tv-kkut aallakaatitami sammineqartoq ASIO-p alaatsinaalereeraa misissuiffigileruttoraalu australiamiunut ilisimatitsissutigisinnaavarput.

Kinamiut Australiap illoqarfiisa pingaarnersaanni, Canberrami aallartitaata suliap oqaaseqarfiginngilaa.

Australiamiut ministeriunerata, Scott Morrisonip suliaq ernumanangaatsiarnerarpaa.

- Pasilliutigineqartut ernumanartorujussuullutillu aarlerinarput, ministeriuneq tusagassiortunik katersortitsinermi oqarpoq.

Australiamut siooranarluinnartoq

Zhaop isertortumik paasiniaasartut kinamiut isertortumik alapernaarsuisuinit Melbournemi sulisoq alla aqqutigalugu saaffiginninneq pillugu oqaluttuussimagai tv-kkut aallakaatitami tusarfinneersoq issuarneqarpoq.

Zhao toqungasoq akunnittarfimmi marsimi nassaarineqarpoq.

ASIO-p pisortaata, Burgessip suliap annerusumik oqaaseqarfigerusunnagu oqaatigaa.

- Akeqqersimaarnerit pissaanilissuillu takornartat suliaqarnerat nunatsinnut taassumalu sillimaniarneranut siooranarluinnarpoq. ASIO-p nunanit allanit akulerunniarnerit Australiamilu isertortumik alapernaarsuiniarnerit paasiniartuarlugillu akiortuassavai, pisortaq tusagassiuutinut nalunaarummi allappoq.

Australiap niueqatigisartagaani pingaarnerpaamut, Kinamut atassuteqarnera ukiuni kingullerni ajorsinikuuvoq.

/ritzau/Reuters

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat