Kinamiut amerikamiut iluartuusaarnerarpaat
Persuttaasarneq amerikamiut inuunerminni toqqissisimanngissutigiuarpaat –inunnik isumaginninnerup iluani, aningaasatigut qulaakkeerisinnaanissaminnut kiisalu kulturertik aallaavigalugu illersorneqarnissaat pillugit pisinnaatitaaffiit naapertorneqarnissaat, Amerikami innuttaasut naatsorsuutigisinnaanngilaat. Amerikamiullu inuusuttortarpassui kinaassutsiminnik takunnissinnaanertik ajornartorsiutigalugu tarniluutigaat. Inuit pisinnaatitaaffii pillugit USA-mi pissutsit qanoq innerannut atatillugu, Kinamiut nalunaarusiaanni ilaatigut taamatut allassimasoqarpoq. Nunarsuatsinni sumiiffinni assigiinngitsuni inuit pisinnaatitaaffiisa naapertorneqarnerat pillugu amerikamiut nalunaarusiaat saqqummersimatsiartoq, Kinamiut Amerikami pissutsit pillugit nalunaarusiaat qulissaannik saqqummerpoq.
Amerikamiulli nalunaarusiaanni Kinami pissutsit ajorsiartuinnartut allaaserineqarpoq, annertuumillu aaqqissuussat nalaanni, soorlu Kinami Olympiadeqarnerata nalaani, allaanerusumik eqqarsartartut amerlanerusut paarnaarunneqartalersut.
Kinamiulli amerikamiut toqqaannartumik iluartuusaartutut taavaat, oqariaasitoqqallu ilaat atorlugu oqarlutik, amerikamiut namminneq igalaaminiinnarnik illoqarlutik ujaqqanik milloortut. USA-mi tusagassiuutitigut allaaserineqartartut, inuillu pisinnaatitaaffiinik illersuiniaqatigiit nalunaarusiaanni atuarneqarsinnaareersut aallaavigalugit, Amerikami paarnaarussat paarnaarussivinni tattoqinneri, ammip qalipaataa aallaavigalugu immikkoortitsinerit, piitsorpassuaqarnera kiisalu aallaasit sumi tamaani ajornanngitsumik pissarsiarineqarsinnaanerat, kinamiut Amerikami pissutsit pillugit nalunaarusiaminni ilanngussorpaat.
- Washingtonimi inatsisartut iluartuusaarunnaarlutik inuit pisinnaatitaaffii pillugit namminneq ajornartorsiutitik nassuerutigisariaqaraluarpaat, kinamiut nalunaarusiaminni ilaatigut allapput.
