Kinamiut akissarsiakitsut atornissaat kommuunip taperserpaa
Aluminiumut Maniitsumi aatsitsiviliornissap pilersinniarnerani apeqqut taanna eqqartorneqartorujussuuvoq.
Tassa borgmester Hermann Berthelsen Karl Lyberthilu kommunalbestyrelsemi Inatsisartunilu ilaasortaasut Akitsinnguaq Olsenip partiini sinnerlugu isummiussisimanerannut assortuisumik isummerput.
Alcoap piumasaqaataa - tassa aluminiumik aatsitsivissarsuarmik sanaartornermi sulisunik avataaneersunik akissarsiakitsunik atuisinnaatitaanissaanut piumasaqaataat Siumukkormiut akerlerilluinnaraluarpaat.
Assortuunnerup kingunerisaanik Akitsinnguaq Olsen Siumukkut siulersuisuuneriniit tunuarpoq, tassalu Siumut sinnerlugu oqaaseqartartutut aamma tunuarluni. Per Berthelsenillu ersarippallaanngikkaluamik radioaviisimut pisoq pillugu nassuiaateqarmat Akitsinnguaq imminut qiviarsimassangatinnerarpaa, politikkikkullu tunngasumik allaanerusumik isummersimagunarnini paasisimagunarnerarlugu.
Taamaariarmat Siumukkormiut Qeqqata kommuneaneersut, Alcoa-millu inissiffiusussameersut ersarissumik maanna isummerput.
Tassa Borgmester Hermann Berthelsenip aamma Karl Lyberthip Inatsisartuni partiit tamarmik Naalakkersuisut isummiussimasaannut tapersersuinissaat kaammattuutiginialerpaat.
Kommunalbestyrelsellu suliniummut akuersaarnissamik isumaqatigiillutik isummiussimasaat ukiaru Inatsisartut katersuutilerpata tamanit akuerineqarnissaa Siumukkormiut nuimasut kaammattuutigaat.