Kinamiup atuakkiaa pissutsinut isornartorsiuisoq saqqummerpoq
Ukiut 20-t matuma siorna Beijingimi "Illoqannginnersami Qilammiorpalaartumi" kitaamiunut qanillattorniartut akerliussutsiminnik takutitsisut, sakkutuunit toqorarneqartut illersormagit, inuunermi sinnera illuminit aneqqusaajunnaarlugu mattunneqarpoq.
Isumaqarsimagaluarpoq inuunermi sinnerani oqaaseqaqqissinnaatitaajunnarluni. Toqunerminilli ukiut sisamat qaangiuttut akissuteqarsinnaanngorsimavoq.
Anitsaaliugaanerminili illumini immiussivissaaqqanik atornikunik nassaarami eqqaamasani suleqatinilu tatigisani immiuttuartarsimavaat. Suleqataasa isertortukkut annissoriarlugit aaqqissoriarlugit maanna atuganngorlugu saqqummersissimavaat.
"Illoqannginnersami Qilammiorpalaartumi" ukiut 20-t matuma siorna eqqissisimasumik akerliussutsiminnik takutitsisunik naalakkersuisut toqoraatitsisimanerat taamanili taannariuarsimavaa, aqutsisullu tatiginngilluinnarsimallugit.
Eqqaamasalikkersaarutaa taaguuserneqarsimavoq "The Prisoner of The State", "Naalagaaffiup Tigusaa". Itisilerlugu oqaluttuaraa taamani kommunistit partiianni ataatsimiittarnerit qanoq ingerlasarsimaneri. Isornartorsiorpaattaaq allannguinerit kingorna ineriartornerup ingerlarnga.
- Immiussami isertortukkut annissami aatsaat tusaasassinni kitaamiutut inuinnaat aqutseriaasiat taannaraa.
Oqaatigaa Kinap siuariartussaguni, perlulioqatigiit, piitsuunerlu anigorneqaqqaartariaqarneri.
Kinap aningaasarsiornerata ilorraap tungaanut ingerlalersimaneranut imminut salliutippoq, taamaalillunilu toqumi kingorna taamani siuttorsuusimasoq Deng Xiao Ping tunuaallatsillugulusooq.
Atuagaq Zhao Ziyangip eqqaamasalikkersaarutaanik imalik marlunngorpat USAmi saqqummersinneqassaaq, naatsorsuutigineqarporlu kingusinnerusukkut kinamiusut naqeriarlugu Hong Kongimi tuniniarneqalernissaa.
