Kinamiunik tikisitsiniarneq atuartartunit aalassassutaavoq
Alcoap Maniitsumi aatsitsiviliornissaanut Kinamiut tikisinneqartussat Danmarkimi tusagassaqartitsivinnut aalassatsitsipput.
Kinamiunik sulisartunik 2.000-inik, SIK-p isumaqatigiissutaa minnerpaaq ataallugu akissarsiaqartinneqartunik pisinnaatitaaffeqarpianngitsunillu sulisartunik tikisitsinissani, suliffeqarfissuup aluminiuliortartup Alcoap piumasarisimavaa. Taamaanngippammi Maniitsup eqqaani aluminiumik aatsitsiviliornissartik 20 milliardit koruuninik akeqartussaq aningaasaliiffiginiannginnamikku.
Alcoap piumasaqaataanut akuersisoqassanersoq, Naalakkersuisunit suli isumaliutigineqarpoq. Aalajangernissamili Danmark avaqqunneqarsinnaanngilaq, tassami Danmarkimi oqartussat tassaammata Kalaallit Nunaanniissinnaanermut sulisinnaanissamullu akuersisussat.
Inatsisinut atortitsinermut ministerip, Morten Bødskovip aviisimut Politikenimut uppernarsarpaa, nunanut allanut tunngatillugu oqartussaasut Kalaallit oqartussaasuinit attavigineqarlutillu oqaloqatigineqarsimasut. Pineqartoq pillugu Inatsisinut atortitsinermut ministereqarfik, inatsisitigut toqqammavissat suuneri pillugit qulaajaalluni aallartittoq, taassuma oqaatigaa.
Alcoali Kinamiunik sulisartunik akikitsunik sulisoqarusuttuni kisimiinngilaq. Nuup eqqaani Isukasiani saviminissamik piiaaffissaq, tunisassiorfimmik attaveqaatinillu sanaartornissaminnut atatillugu Kinamiunik 1.000-inik aamma tikisitserusuppoq. London Miningip pisortaata, Xiaogang Hup aatsitassarsiorfissap pilersaarusiorneranut pisortaasup, qanittukkut aatsitassat pillugit isumasioqatigiinnermi oqaatigaa, sanaartornerup nalaani sulisartunik akissaasersueriaaseq Kalaallit Nunaanni atorneqartoq atorneqassappat aatsitassarsiorfik imminut akilersinnaassagunanngitsoq. Sulisartunik Kinamiunik sulisoqarnikkut 1 milliardit koruunit sipaarneqarsinnaassagunartutut eqqoriarneqartut, aviisimi Weekendavisenimi allaaserineqarpoq.
Kinamiunik akilernerlugaasunik atorfinitsitsinissaq Sulisitsisut Peqatigiiffiata SIK-llu sakkortuumik akerliuffigalugu nalunaaruteqareerput.
- Siliffeqarfissuit nunanit allaneersut isumaqatigiissutit naapertorlugit akissaasersuisariaqarput, taamaanngippammi maanga takkuttariaqanngillat, Jess G. Berthelsen aviisimut Politikenimut oqarpoq.
Ekstra Blademilumi atuartartut isumaqarput, Alcoa sulisartunik akikitsunik Kinameersunik tikisitsisariaqanngitsoq. Aaqqissuisoqarfiup matunngilaarnerani 89,15 procentit akerliullutik taasisimapput, 10,85 procentiinnaallu akuersisimallutik.
