Kinamiunik sulisoqarnissaa Siumumit ammaffigineqarpoq
Alcoap aluminiumik nunatsinni aatsitsiviliorsinnaanissaa pingaaruteqarmat, aatsitsiviliornissamik taamaatitsiinnartoqannginnissaa qulakkeerneqartariaqartoq, Siumup politikkikkut oqaaseqartartuata Karl Lyberthip oqaatigaa:
- Aluminiumik aatsitsivik nunatsinnut tamarmut ukiorpassuarni annertuumik iluaqutaasussaammat piviusunngortinnissaanut Siumut suleqataajuassaaq, pilersaarutillu piviusunngortinnissaanut aporfiusinnaasunik tamanik qaangiiniarnermi, sulisartoqarnermut apeqqutit ilanngullugit, oqaloqataassalluta, Klarl Lyberth oqarpoq, nangillunilu:
- Aammami Siumumi siuttuulluta suliaq aallartinnikuugatsigu pingaartipparput pilersaarutip sapanginneqannginnissaa, Karl Lyberth ilaatigut allappoq.
Sulisut Kinaminngaanneersut aatsitsiviliornermi nukissiorfiliornermilu atorneqannginnissaat, Sulinermik Inuussutissarsiuteqartut Kattuffiata piumasaraa, Siumullu Alcoamik maanna oqaloqateqarusunnera, SIK-p siulittaasuanit Jess G. Berthelsenimit tupigusuutigineqarpoq.
- Taanna akuerisinnaanngilarput, peqqutigalugu akuersaassagutsigu taava qularutiginngilarput, sulisitsisut tullii uagutsinnut isumaqatiginninnialerunik aamma kissaatigissagaat taakkutulli pineqarnissartik. Taava nunatsinni aningaasarsiaqartitsineq sequtserlugu aallartissavarput, tamannalu akuersaarsinnaangilarput, Jess G. Berthelsen oqarpoq.
Sulisorineqarsinnaasut pillugit Siumuminngaanniit piumasaqaateqartoqarpoq:
- Saneqqunneqarsinnaangitsutut piumasarissavarput sulisartut allamiut akikitsut atorsinnaanerinut akuersisoqassappat taamaallaat aatsiterivimmik erngullu nukii atorlugit nukissiorfimmik sanaartornermi atorneqassammat, allamik naamik, Siumup politikkikkut oqaaseqartartua Karl Lyberth allappoq.
