Assi: KNR

Kinamik suleqateqarnissaq Hammondip Larsenillu taperseraat

Nunarput suliassaqarfinni nunatsinnit akisussaaffigineqalereersuni kinamiut suliniutaat pillugit aalajangiisinnaassuseqarpoq. Aaja Chemnitz Larsen Aleqa Hammondilu taama isumaqarput.

Kinamiulli Issittumi siuariartorniarnerannut qisuariarnissaq eqqarsaatigalugu Danmarkip suleqatiginissaa pingaaruteqartoq, politikerit aamma isumaqarput.

 - Kinguneqartussamik oqaloqatigiinnissamut illersuisuusuaannarpunga, Inatsisartut nunanut allanut sillimaniarnermullu ataatsimiititaliaanni siulittaasoq, Aaja Chemnitz Larsen oqarpoq, nangillunilu.
 
- Nunattali suliassaqarfinni akisussaaffigileriigaani kinamiunik isumaqatigiissuteqarnissamut oqaloqatigiissuteqarsinnaanermullu soorunami pisinnaatitaaffeqarnerput erseqqissaatigissallugu pingaaruteqartoq isumaqarpunga, Aaja Chemnitz Larsen oqarpoq.

Kinap Issittumut periusissiani siulleq januaarimi saqqummiuppaa,  Issittumilu takussaanerulernissaat ilimanaateqarpoq. Taamaammat Nunatta Danmarkillu kinamiut Issittumi siuariartornissaannut piareersaqatigiinnissaat tamanit iluaqutigineqassasoq, illersornissaqarfiup ilisimatusarfia misissueqqissaarnermi allappoq.

Nunatsinni Danmarkimilu oqartussat ammasumik, ataqqeqatigiittumik kinguneqartussamillu suleqatigiinnissaat misissueqqissaarnermi inassutigineqarpoq.

AAMMA ATUARUK Kina Issittumut eqqissisimanartumik iliuusissamik qinersisoq

Inassullu taanna Folketingip Kalaallit Nunaannut tunngasunut ataatsimiititaliaani siulittaasup, Aleqa Hammondip isumaqatigaa. Naligiittutut suleqatigineqassagutta.

- Tusarniarfittuinnaanngitsoq kisiannili suleqatitut pingaarnertut taavalu naligiimmik inissisimalluni periuseqarnissaq, Aleqa Hammond taama oqarpoq.

Nunarput naalagaaffiup Issittumut politikkianut sunniuteqarnerusariaqartoq, Aleqa Hammond isumaqarpoq.

- Taamaanngippat, Kinamut soqutigisavut immikkoorlutillu tamarmik illuatungaanut sammisussaapput. Tamanna kialluunniit nukittuallaatigisinnaanngilaa. Tamatta ajoqutigisussaavarput, Aleqa Hammond taama oqarpoq.

Suliassaqarfinni nunatsinnit akisussaaffigineqalereersuni nunarput nammineq aalajangiisinnaassuseqartoq aamma taassuma erseqqissaatigaa.

AAMMA ATUARUK Nuuk Københavnilu Kinamut piareersimasariaqarput

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat