Kinami qarsutsinerit inuppassuarnik eqquipput
Kinami siallingaarmat qarsutsinersuaqarpoq, inuillu 5 millioninit amerlanerusut angerlarsimaffimminnit qimaguttariaqarsimapput.
Qarsutsinerit inuppassuarnik eqquipput, nunallu immikkoortuisa 24-it eqqorneqarnerpaat ataatsimut isigissagaanni inuit 200 millionit eqqorneqarsimallutik.
Qarsutsinerit ukiut 100-t ingerlanerini aatsaat taama ingasatsigisut Røde Kors-ip nalunaarutigaa.
Inuit piitsut 400.000-it missaanniittut ikiorneqarnissaat pillugu Kinami Røde Kors aningaasaliisussanik ujarlerpoq, 42 millioni koruunit ujartorneqarlutik.
- Kinami inuuniarneq pitsanngoriartuinnartoq pigissaartullu amerliartuinnartut tusartarparput, piitsorpassuaqartorli aamma nalunngilarput, taakkuuppullu ikiorneqartariaqarluinnartut, Dansk Røde Kors-imeersoq Birgitte Ebbesen oqarpoq.