Kinami piitsut piitsunngoriartuinnartut

januaarip 08-at 2007 10:55

Kina-mi pisuut pisuunngoraluttuinnarput piitsullu piitsunngoraluttuinnarlutik.

Naak naalakkersuisut ukiuni arlalinni assigiinngissutsip minnerulersinnissaa pingaartillugu suliniutigigaluaraat, innuttaasut inooqatigiinnikkut aningaasarsiornikkullu atugaasa assigiinngissutaat alliartuinnarpoq.

Nalunaarusiami nutaami takuneqarsinnaavoq naalagaaffimmi kommunisme-mik ingerlatsiviusumi innutaasut atugaasa assigiinnginnerat, Amerikami Kujallermi Qiterlermilu assigiinngissutsitulli ingasatsigisoq.

Kinap aningaasarsiornera pitsanngoraluttuinnarpoq, ukiut tamaasa qaffariangaatsiartarluni, ukiunilu kingullerni 20-ni taamaattuarsimavoq. Maannalu nunarsuarmi nunani aningaasarsiornikkut ingerlalluarnerpaanut sisamaalersimavoq. Taamatulli ingerlalluarneq aamma illuatungeqarpoq. Inuit pigisallit pigisaqanngitsullu assigiinngissutaat alliartuinnavippoq.

Ilaqutariit aningaasaqarniarnerannik misissuinerup nutaap ineriartornerup taamatut ingerlanera uppernarsarpaa.

Ullumikkut Kinamiut ilaqutariit pisuunersaasa 10 procentiusut pisuussutit 40 procentii pigisaraat, ilaqutariillu piitsuunerpaat 10 procentiusut taamaallaat pisuussutit 2 procentii pigisaraat.

Illoqarfimmiut aamma nunaannarmiut atukkamikkut assigiinngissutaat aamma alliartuinnarpoq.

Illoqarfiit pingaarnersaanni Beijingimi isertitat agguaqatigiissillugit qaammammut 1000 koruunit sinnilaaqqavaat, nunaannarmilu illoqarfimmiut agguaqatigiissillugu qaammammut 500 koruunit isertittarpaat. Nunaannarmi naasorissaasut agguaqatigiissillugu taakkua sisamararterutaannaanik isertitaqartarput, tassa qaammammut 150 koruunit missaannik.

Misissuinerup aamma ersersippaa Kinamiut ilaqutariit nakorsaatinut aningaasartuuteqarnerpaasartut.

Kinamiut ilaqutariit aningaasartuutaasa 12 procentii nakorsaatinut nakorsiarnernullu atorneqartarput taakkualu ilinniarnernut aningaasartuutaannit amerlanerupput.

Kinamiut nunarujussuarmi tassani isertitat assigiinnginnerujussuat nalunngilaat. Isumasiuinermi 90 procentit isertitat assigiinnginnerujussuat ernumanartoqartippaat. Aamma naalakkersuisut isertitat assigiinnerulernissaat suliniutigaat, kisianni misissuinerup killormut ingerlasoqartoq ersersippaa.