Kinami nuna sajuttoq
Beijingimi Olympiadep aallartinnissaanut ullut pingasuinnanngortut Kinap kujataata kippasinnersaani, Sichuanimi Gansumilu nuna ullumi sakkortuumik sajuppoq. Nunap sajunneranut uuttuut 6,0-iulluni.
aggustip 05-at 2008 11:50
Sichuanimi maajip qaammataani nuna sajorujussuarmat inuit 70.000-it ajunaarput. Ullumi nunap sajunnerata kingorna aqqunartitersimasunik aseruinernilluunniit suli nalunaartoqanngikkaluartoq nunap taamatut sajunnera annertuumik aseruisinnaasoq naluneqanngilaq. Kinami pisortanit nalunaarutigineqarpoq nunap sajunnera Sichuanimi illoqarfiit pingaarnersaanni Chengdumi ullumi malugineqarsinnaasimasoq, tassani ullumi ullaap tungaa Olympiadeqarnissaanut ikumatitaq aqqusaarunneqarpoq. Olympiadertut tallimanngorpat aallartissapput.
