Kinami nuna panermat qamutilillutik siallertitsiniaraluarput
Silasiortut siallertitsiniarlutik sakkut nutaat atorpaat. Kinami ukiuni kingullerni 50-ini aatsaat taama panertigaaq. Taamaammat Kinamiut silasiortuisa siallertitsiniaallutik raketit qamutillillu atulerpaat. Kinap avannarpasinnerusortaani panernerpaami naasorissaasut narsaataat imerterniarlugit raket-it qamutillillu atorlugit kemikaliat, tassa sananeqaatit kattunerisigut siallertitsiniaapput. Naasorissaasummi qajuusiassanik naatitsisut qanittukut siallinngippat inerititassaarutilerput.
Raketilli 2000-it igeriukkaluaramikkit 400-riarlutillu qamutilittartaraluaramik sukkut tamaana sialualaarlunilu isugutsilaaginnarpoq. Sumiiffimmi panernerpaami 4,5 miliuuninik inoqarpoq. Pisortallu qannguluttumik iliuuseqarnerat naasorissaasunik eqqissisimatitsiniaanertut alapernaattunit isiginiarneqarpoq. Naasorissaasummi inerititaqanngippata suliffissaaleqisut, taamaalillutillu naammaginninngitsut amerlissapput. Taamaammat pisortat maannangaaq uninngaanaratik takutitsiniarnerat eqqissisaaniarnertut isigineqarsinnaavoq. Pisortat naasorissaasunik ikiuiniarlutik 66 miliarti koruunit illuartippaat, nunarsuatsinnili aningaasaqarniarnikkut ajornartorsiorneq Kinamut aamma sunniuteqariartulermat aningaasat aamma nalikilliartulissapput. Taamaalippallu qanngulutsitsineq iluaqutaanavianngilaq.