Kinami immuit toqunartumik akoorneqarunnaartut
Kinami immuit akuutissallit inunnut kingunerlutitseqisut qaangerneqalerunarput. Misissuinerit inernerisa kingulliit takutippat Kinami immuk nioqqutigineqartoq akuutissamik melamin-imik akoorneqarunnaarsimasoq, taama Dr.dk-imi allaaserinnittoqarpoq.
Allattoq Oline I. Olsen
oktobarip 05-at 2008 13:25
Melamin plastikkiliornermi akuutissatut atorneqartarpoq immunnullu nalequttuunani, Kinamilu immuit taamatut akoorineqarsimanerat meeraaqqat sisamat toqqutigereerpaat meeqqallu 53.000 napparsimalersimallutik.
Immuit assigiinngitsut 609-it akornanni tigusillattaarinikkut misissuinerit inernerisa takutippaat melamin-imik akoorineq unitsinneqarsimasoq, immuillu toqunartuerussimasut.
Kinami immuit akuutissalersorneqartarnerat paasineqarmat nunalerinermut naalakkersuisup pisortaqarfinni atorfillit 152.000-it soraarsippai, immunnillu katersuiviit 19.000 immikkut misissuiffigisillugit.
EU-milu immummik meeqqanut nerisassiat imerneqarsinnaasullu tamarmik eqqussoqqusaajunnaarlugit aalajangiisoqarpoq.
