Kinami corona peqqutigalugu mattuteqqakatallutik akerliusut
Kinami coronamut killilersuinerujussuaq pillugu maanna inuppassuit 100-likkaat Shanghaimi akerliussutsimik takutitsileruttorput.
Oqaluttuarineqarporlu akerliussutsimik takutitsisorpassuit covid-19-mut atatillugu mattussinerit sukangasuut aammalu mattusimagallartitaanerit ulluni arlalippassuarni pisartut akerleriniarlugit Beijingip universitetiata ataqqisaanerpaap eqqaanut katersuussimasut.
Erseqqissaatigineqarporlu universitetini taama ittuni tassa pikkorivissunut universitetit ilinniarfiusut eqqaanni akerliussutsimik takutitsinerit qaqutigorujussuaannaq pisartut.
Taamatuttaaq Kinami illoqarfinni minnerni aamma akerliussutsimik takutitsisoqarsimavoq.
Akerliussutsimik takutitsisut pappiaqqamik qernertumik tigummiaqartarsimapput taamaalillutik kamannertik ersersikkumallugu, videorpassuillu qarasaasiakkut inuit naapittarfiisigut siammarterneqaqattaartuni takuneqarsinnaavoq inuppassuit pappiaqqamik qernertumik tigummiaqartut.
Akerliussutsimik takutitsinerit Kinami illoqarfiit ilaanni Urumqi-mi aallartissimapput tassanimi sisamanngormat inissiamik ikuallattoqarpoq inuit qulit inuunerannik naleqartumik, oqaatigineqarporlu ikuallanneq pilersimasoq coronamik mattusimatitaanerujussuit peqqutaallutik inuit tassaniittut angerlarsimaffimminnik qimagussinnaanngilluinnarmata.
Inuimmi ilaat Kinami ullut 100-t sinnerlugit mattusimasarsimapput.
Eqqissiviilliornerillu aatsaat taamak sakkortutigisut Xi Jinping Kinami siuttunngormalli.
