Kinami aningaasaqarniarneq assigiinngisitsiffiuvoq

Kineserinut pitsaanngitsoq unaavoq ajornartorsiorneq alligaluttuinnarmat illoqarfimmiullu nunaannarmiuninngarnit sisamariaammik akissarsiaqarnerullutik, akissarsiaallu qallunaat aningaasanngorutsigik nunaannarmiut agguaqatigiissillugu 22.000 kronenik illoqarfimmiullu 90.000 kronenik akissarsiaqarput taakkualu ukiuni qulini annertusiartorsimallutik naak nalunaarusiarpassuarni tamanna oqallisigineqartorujussuugaluartoq. Tamatumani eqqaamaneqassaaq inuit 7-8 millionit eqqartorneqarmata, siornatigullu pilersaarutigineqartartut imatut iluatsissanatik.

Pisuut piitsullu assigiinngissutaat iliuuseqarfigineqanngippata suut annilaanngatigineqarnersut Jan Larsen aperineqarami akivoq:

- Kineserit siuttuisa annilaanngatigiuagaat tassaavoq inuttut atukkat assigiinngissusiat, tassa piitsuussuseq pillugu eqqissiveerunnissaq. Pisuut illoqarfinni najugallit qanoq pisuujutiginerat piitsunit takullugu naammagiinnarneqarsinnaanngilaq isumaqarlutillu tamanna naapertuilluarnerunngitsoq, partiillu naalakkersuisulluunniit amerlanertigut taakkujuartut pikitsitsiffigineqarsinnaallutik,

piitsullu illoqarfimmiikkaangamik nunamit allamit suliartortutut misigisimasarlutik.