Kinami aamarsuarsiorfimmi kingumut ajutoortoqarpoq
Sulisartut 239-t aamarsuarsiorfimmit qaqinneqarsinnaasimapput, sulisartulli aqqanillit suli maqaasineqarlutik. Taakkuli suli uumatillugit nassaarineqarsinnaanissaat nalorninarsiartuinnartoq, Ritzauimi allaaserineqarpoq.
- Aamarsuarsiorfimmi sulisartut aqqanillit mattussaaqqasut uumaannarsimanissaat qularnarsiartorpoq. Nassaariniarnerat ullunik pingasunik sisamanilluunniit sivisussuseqassaaq, annaassiniartuni pisortap tullia, Du Bo naalagaaffiup tusagassiorfiini taama issuarneqarpoq.
Taassuma oqaluttuaraa, sulisartut allat 26-t ajunaartut assigalugit taakku ajunaarsimassasut, tassami gassimik qaartoornikkut, aamarsuarsiorfiup sulluliartaa, aamarsuit pujoralaannit 2500 tonsiusunit immerneqarmat. Taassuma ilanngullugu oqaatigaa, sulisartut 26-t ajunaartut pujoralammit ipillutik ajunaarsimasut.
Sulisartut aqqanillit maqaasineqartut, aamarsuarsiorfiup sulluliartaata isaariaanit 50 meterinit 80 meterinut appasinnerusumiinnissaat ilimagineqarpoq, aamarsuilli pujoralaat pissutigalugit annaassiniarneq sulluliani amitsuni ajornakusoortinneqarpoq.
Kina aamarsuarsiorfinni ajutoornernit eqqorneqakulasuuvoq. Pisortatigoortumik kisitsisaatigineqartut naapertorlugit aamarsuarsiorfinni sulisartut 2600-nit amerlanerusut siorna ajunaarput, tusarfiilli kikkunnulluunniit attuumassuteqanngitsut oqaatigaat ajunaartut amerlanerujussuussasut, tassami aamarsuarsiorfiutillit ajutoornerit isertuukkajuttarmatigik.
