Kinaassutsimik isertuusisoq: KNI-mi pisortaaneq soraarsitaavoq

KNI-p iluanni sivisuumik eqqissiviilliortoqareerneratigut pisortaanerup soraarsitaanerannik kinguneqarunarpoq. 

Radioaviisi KNI-mi pisortaanerup soraarsitaanerannik paasiniaanitsinni iluatsitsivallaanngilagut.  KNI-imi pisortaaneq Claus Jensen Radioaviisimit oqaloqatiginiaraluaratsigu iluatsinngilarput aammalu KNI-mi siulersuisuni siulittaasoq Niels Thomsen suliaq pillugu oqaaseqarumanani. 

'Siulersuisuni tamanna pillugu oqaaseqarusunngilanga. Sulisitsisut sianerfiginiarsigit.' Niels Thomsen ilaatigut oqarpoq. 

KNI-mi aningaasaqarnermi immikkoortortarfimmi pisortaq, sulisullu allat Radioaviisimit paasiniaaffiginerani oqaaseqartissallugit iluatsitsinngilagut, suliarlu pillugu ilisimasaqannginnerartarlutik.  

Sermitsiarlu naapertorlugu KNI-mi eqqissiviilliortoqarpoq. 

Ilaatigut KNI-imi aningaasaqarnermut immkkoortortaqarfimmi sulisut affai marlunngormat suliffimminiit angerlartinneqarput aammalu pisortaaneq Claus Jensen kinaassutsimik isertuusisumit annertuumik allakkatigut isornartorsiorneqarpoq. 

Angerlartitsinerit peqqutigitinneqarpoq,  allagaq siulersuisunut tunniunneqartoq kinaassutsimik isertuusisumit quppernernik arfineq-marlunnik isornartorsiuinernik imalik.  

Arnaq ataaseq pisortamit allagaqarsimasutut pasillerneqarpoq, taannalu oktobarip 21-ani suliffimminiit angerlartinneqarluni. Taannalu arnaq allagaqarsimasutut pisuujumanngilaq. 

Aviisi naapertorlugu isornartorsiut pingaarnersaraat pisortaanerup toqqaanartorujussuarmik nunanit allanit annertuumik sulisussarsiniartarnera.   

Isornartorsiutit tamaangat killinngillat. Ilaatigut Naalakkersuisut siulittaasuat Aleqa Hammondip suliffeqarfissuup ukiumoortumik ataatsimeersuarneranni siunersortinik avataaneersunit atuilernerusimaneq aningaasanik 30 million koruuninik naleqartoq ilaatigut isornartorsiutigaa.

Sermitsiap allaaserisaa inatsisartuni aamma qisuariarfigineqarpoq. Tassa Inatsisartunut ilaasortap Jens Immanuelsenip, Siumut, paragraf 37 naapertorlugu apeqqutigimmassuk qanoq Naalakkersuisut KNI-mut piginnitutut iliuuseqarniarnersut, sulisummi malersugaasutut misigisimammata. 
Jens Immanuelsen apeqqutiminik tunngavilersuutigaa KNI-mi pisortat qullersaat taamatut iliuuseqarnerat akuerineqarsinnaanngimmat.