Kina uuvanngussanersoq suli naluaat
Folketingimut ilaasortanngorlaaq taanna ukioq manna sianiilliornerpaasimasutut ukiup saarulliatut aviisimik Ekstra Bladetimik atuartartut qinersimavaat.
Ny Alliancep siulittaasuanit, Naser Khaderimit Jørgen Poulsen siuarneruvoq, taavalu Enhedsliste sinnerlugu Folketingimut qinigassanngortittoq, Asmaa Abdol-Hamid, normo 3-nngorpoq. Ukiortaami saarullinnattussatut toqqarneqartut ilagaat politikeri Mogens Camre, akisussaasoq Henrik Qvortrup, cykilertartoq Michael Rasmussen taavalu Danmarks Radiomi generaldirektøri, Kenneth Plummer.
Jørgen Poulsen, ukiortaami saarullinnattoq, Folketingimut qinersinermi taamaallaat 2.204-init taaguunneqarpoq, saarullinnattussatulli toqqarneqarami 2.870-init taaguunneqarluni. Jørgen Poulsen tusagassiutitigut sammineqarlualerpoq Folketingimut ilaasortanngorami ikiuiniaqatigiiffimmit Røde Korsimit tunuarami trekvart millioni koruuninik pissarsigami.
Ajugaanini pillugu aviisimit Ekstra Bladetimit aperineqarami Jørgen Poulsen ilaatigut ima oqarpoq:
-Aap, ajugaanissannut tunngavilersuutit taakkuuppata, tassa tusagassiuutitigut sammineqangaatsiarnera tunngavilersuutigissappassuk, isumaqarpunga ajugaanera tunngavissaqarluartoq.
Aalisarnermut Naalakkersuisoq, Finn Karlsen, siorna uuvannappoq.
Folketingimut ilaasortaq, Lars-Emil Johansen, Siumut, IA-miit Johan Lund Olsen, Naalakkersuisunut ilaasortaq, Tommy Marø, Siumut, Sulinermik Inuussutissarsiuteqartut Kattuffianni siulittaasoq, Jess G. Berthelsen, aningaaserivik Grønlandsbanken, ukiormanna uuvannattussatut aamma toqqagaagaluarput, soorlu aamma Nuummi politikerit, Doris Jakobsen, maanna borgmesteri, Nikolai Heinrich, aamma maanna pineqaatissinneqareersoq, Jen Napãtôk’, aamma eqqaaneqarsimasut.
Radioavisi nutaarsiassalunnini pissutigalugu aamma eqqaaneqarsimagaluarpoq, taamaammat Sermitsiamik atuartartut toqqaanissaat pissangalluta qilanaarlutalu utaqqimaariartigu, imaassinnaavormi uuvannattugut.
