Kina silaannarsualiartitsivoq rumstationimik inaarsaajartortussanik
Kinamiut ullumi sapaammi raketsimik silaannarsuarmut aallartitsipput, astronautinik pingasunik issimasulimmik, taakkulu Kinami nutaatut rumstationiliarineqartumut inaarsaassapput.
Long March-2F-raket Kinap avannaatungaaniittumiit Jiuquan-centerimiit ullumi aallarpoq.
Kinami naalagaaffiup tv-qarfissua CCTV taama nalunaarpoq.
Astronautillu taakku pingasut qaammatini arfinilinni silaannarsuarmiissapput, rumstationiliaq nutaaq Tiangong inaarsariartorlugu.
Tiangong isumaqarpoq ”Qilammi illussaarsuaq”, Kinamiullu naatsorsuutigaat ukioq naatinnagu taanna naammassineqassasoq.
Rumstationiliarineqartoq nunarsuatsinnik kaajalukaartussaq avasissorsuarmiissanngilaq minnerpaamillu ukiuni qulini
ingerlaassalluni 400-450-t kilometerit akornanni avasissusilimmiissalluni.
Tiangongip rumstationiusimasoq taamatulli aamma atilik taarsissavaa.
Kina 2011-mi nunat tamalaat rumstationeqarfianiit (ISS)-miit peersitaavoq, USA naapertorlugu Kinamiut rumprogrammi atugaat sakkutooqarnermut attuumassuteqartussatut aaqqissugaammat.
ISS-milu suleqatigiit tassaapput USA, Rusland, Canada, Europa aammalu Japan.
Kineserit aamma pilersaarput qaammammi baseliorniarlutik, kineserillu avataarsuarmut tunngasumik allaffeqarfissuata oqaatigaa, qaammammut immikkut suliarinnikkiartortussanik aallartitsinissartik 2029-mi pissasoq naatsorsuutigigitsik.