Kina-p Nunarput soqutigaa

Kina-mi politikerit nuimasut, tassa premierministerip tullersortaa Hui Lianyu aammalu nunanut allanut ministerip tullersortaa Zhang Yesui, Kalaallit Nunaannik niueqateqarnissamut soqutiginnittut Kina-mik niueqateqarsinnaaneq anguniarlugu Nunatsinnit Kina-mut aallartitaq Johan Lund Olsen oqarpoq.

- Paasinarpoq Kiniiserit niueqatigiinnissamut soqutiginnittorujussuusut. Immikkut soqutigilluinnarpaat uuliamik aammalu gassimik ujarlernermi peqataasinnaanertik, Johan Lund Olsen oqarpoq nangillunilu. Aamma aalisarnermut tunngasuni annertunerusumik niuersinnaaneq, ammeriviullu Great Greenland-ip Kina-mik niueqateqarsinnaanera eqqartorneqarpoq. Kina-mi innuttaasut 20 mio-it missaanniittut ukiut tamaasa nunanut allanut takornariarusuttarput, nunatsinnullu takornariartinneqartalernissaat aningaasarsiuutaalluarsinnaavoq, Johan Lund Olsen oqarpoq.

Kina-mi innuttaasut Nunatsinnik ilisimasaqarpallaannginnerat malunnartoq, Johan Lund Olsen-ip ilanngullugu oqaatigaa. Nunatsinni Naalakkersuisut siulittaasuat Hans Enoksen Kina-mi angalanermut peqataavoq.