Kina nunarpullu assigiissuteqarput

Kinap Danmarkimi aallartitaata nunatta Kina-llu assigiissuteqarnerat unnerpaa.

- Kalaallit Nunaat Kina-misulli nunatamigut annertoorujussuuvoq, inuiaallu taakkulluta tamaviaarluta sulissutiginiakkavut kinguneqarluartarput pinngortitap tunniussinnaasai atorluartaratsigit, taama oqarpoq Kinap Danmarkimi aallartitarisimasaa soraarninngortussanngortoq Zhen Jianguo.

1964-imi 19-inik ukioqarluni siullerpaamik Danmarkimut peqqaarami danskisut ilinniarpoq.

Kingorna Kina sinnerlugu Danmarkimi aallartitatut sulilerpoq ilaatigut Kalaallit Nunaaliartarsimalluni.

Ambassadørip taassuma naliliinera naapertorlugu nunat taakku marluk assigiissutaat takujuminaassinnaagaluartoq taamaattoq assigiissuteqarput. Aappaa ukiumut 9,2 procentimik aningaasaqarnikkut qaffariaateqartarpoq, aappaalu ukiumut 2,3 procentimik iluanaaruteqartarluni.

Kina Kalaallit Nunaanniit tallimariaammik angineruvoq 1,3 milliard-inillu inoqarluni, illuatungaatigut Kalaallit Nunaat 57.000-nik inoqartoq.

Ambassadørilu isumaqarpoq, tamakku tunngavigalugit nunat taakku marluk siunissami suleqatigiissinnaalluartut.

- Isumaqarpunga nunat taakku marluk siunissami suleqatigiilluarsinnaasut, aningaasaqarnikkut kulturikkullu tunngassuteqarnerusunut, oqarpoq.

Aammattaaq Kinamiit ambassadøriusimasup nunaqqatini kalaallillu assigiissuteqarnerarpai.

- Isikkutta qalipaataat aamma assigiissuteqartorujussuupput aammalumi kiinnatta ilusaat assigiittorujussuusarput, Zhen Jianguo oqarpoq.

Ambassadøri Zhen Jianguo, ullumikkut Danmarkimiit Kinamut angerlarluni aallarpoq.

Arfininngormallu Namminersornerullutik Oqartussat saqqarmiuliuttagaannik kuulti sanaamik saqqarmiulerneqarpoq.