Kina-miut nunatsinni uuliasiornermi peqataasinnaalissapput
Qeqertarsuup kimmut imartaata nalaani uuliaqarsinnaanersoq misissorneqalerpat, Kina peqataasinnaalissaaq.
Kinami uuliasioqatigiiffik CNOOC nunatta aatsitassanut ikummatissanullu pisortaqarfianit, NunaOilimit kiisalu GEUS-imit atorfilinnit ulluni makkunani ataatsimeeqatiserineqarpoq.
Uuliasioqatigiiffik pisortanit pigineqartoq tassaavoq China National Offshore Oil Corporation, naalisarlugu CNOOC.
Kinami uuliasioqatigiiffiit annersaasa pingajoraat, siornalu 50 milliardi koruunit sinnerlugit kaaviaartitaqarpoq.
Aatsitassanut ikummatissanullu pisortaqarfiup ukioq manna aallarnerfigalugu ammaassineratigut Qeqertarsuup kimmut imartaata nalaa uuliasioqatigiiffinnit misissueqqaarfigineqarsinnaalerpoq.
Jørn Skov Nielsenilu Aatsitassanut ikummatissanullu pisortaqarfimmi pisortaasoq isumalluarpoq:
- Nunatta kimmut imartaani uuliasiorsinnaanissamut periarfissat suuneri Kinamiinnitsinni takutikkusuppagut, nunamillu sajutsitsilluni misissuinerni paasissutissat isumalluarnartut takutikkusullutigit, Jørn Skov Nielsen oqarpoq.
Uuliasioqatigiiffiit angisuut USA-meersut Canadameersut Europaminngaanneersullu siornatigut ataatsimeeqatigineqareerput.
Uuliasioqatigiiffiit arlallit misissuiumallutik neqerooruteqassappata, neqeroorutit Kalaallit Nunaanni Aatsitassat Ikummatissallu pillugit Siunnersoqatigiivini qimerloorneqaqqaassapput, kingornalu nunatta naalakkersuisunut danskillu naalakkersuisuinut innersuussuteqartoqassalluni.
Kalaallit Nunaanni Aatsitassat Ikummatissallu pillugit Siunnersuisoqatigiit kalaallinik tallimanik ilaasortaqarpoq, qallunaanillu tallimanik ilaasortaqarluni.
