Kina-miut arnartaasa iviangii allisimapput
Kiniiserit arnartaasa iviangiisa alliartuinnarnerat aviisip Politikenip allaaseraa.
Tamanna paasineqarsimavoq atisaliortartut maluginiartalermassuk kiniiserit arnartaanut iviangequtilioraangamik siornatigut iviangequtit A-mik B-millu angissusillit sanaartortarsimagaluarmatigik, maannali suli anginerit allaat C D E-illu tikillugit angissusillit sanaartortalersimagamikkit.
- Kiniiserit arnartaat 20-t ataallugit ukiullit iviangii alliartuinnarput ingammik illoqarfissuarni anginerni soorlu Shanghai-mi Beijing-imilu, taama oqarpoq atisaliorfimmi Triumph-imi atisanik tuniniaasartoq Zhang Jing.
Atisaliortartulli kisimik tamatuminnga malussarnianngillat, aammali sapaatip-akunnera kingulleq atisat ineriartortinneqarnerat pillugu ilisimatusarfiup Beijing-imiittup nalunaarusiaa saqqummiunneqarpoq kiniiserit arnartaasa iviangii 1990-ikkunnut naleqqiullugit centimetererpaalunnik alliallassimasut.
Oqaatigineqarporlu kiniiserit arnartaat peqqinnartunik nerinerulersimasut timersornerulersimasullu taamaalillutillu iviangii anginerulersimallutik.
