Kina ivertinneqassanersoq apeqqutaatinngilaat

USA-mi kina præsidentinngussanersoq nunatsinnut apeqqutaavallaanngitsoq, nunatsinni politikerit nuimanerit ilaat naliliipput. Inatsisartut nunanut allanut sillimaniarnermullu ataatsimiititaliaani siulittaasoq Siumumeersoq Per Rosing Petersen ima oqarpoq:

- Ukiorpassuarni præsidentiusarsimasut misigisaqarfigilluarsimavavut, assersuutigalugu illersornissamut isumaqatigiissutip nutarternera suleqatigiilluni Nunatsinnit augustimi atsioqataaffigineqartoq eqqarsaatigalugu suleqatigiilluarsimavugut. Taamaattumik kinaluunnit præsidentinngoraluarpat apeqqutaanngilaq. Per Rosing Petersen tunngavilersuivoq.

Per Rosing Petersenip oqaasiinut naalakkersuisuni ukiorpassuarni siulittaasuusimasoq maannalu Inatsisartut siulittaasuat Siumumeersoq Jonathan Motzfeldt aamma isumaqataavoq.

- Nunatsinnut sunniuteqarsinnaanerat kisimi matumani apeqqutaavoq. George W. Buship nalaani ajunngitsumik aamma suleqatigereerparput, taamaattumik præsidentinngortussap piumassuseqarnera nunani tamalaani tamatta pissangalluta utaqqivarput. Jonathan Motzfeldt naliliivoq.

Nunanut allanut naalakkersuisoq Josef Motzfeldt isumaqataavoq:

- Tassa nunarsuarmi isumaqatigiissutit ataqqineqarnerunissaat isumaqarpunga ilimagineqarsinnaasoq, aamma præsidentiusartut sivisunerpaamik ukiuni arfineq-pingasuni præsidentiusinnaagamik aapassaaneernermi inussiarnernerusumik ingerlatsisinnaanerat isumalluutigerusunnaraluaqaaq. Apeqqutaassaarli præsidentinngorumaartussap kikkut siunnersortigissanerai, Josef Motzfeldt oqarpoq.

USA-mi qinersinermit inernerit pisortatigoortut aatsaat ullut aqqanillit qaangippata tusarliunneqassapput, allakkatigut taasisut naatsorsorneqareerpata.