Kina ikiorsiinissamut piareersimavoq

Taama Kinap vicepremierministeria Europami nunanut assigiinngitsunut tikeraarnermini oqariartuuteqarpoq.

Aningaasatigut ikiorserneqarnissamut siullermik Grækenlandi, tullianik Irland noqqaapput, maannalu tassa Spania ikiorserneqarnissaminnut noqqaanissaminut tullinnguuppoq. Neriunaateqarporlu kangiani nunamit aningaasarsiornikkut ingerlalluartumit ikiorneqarnissaa.

Kinap vicepremierministeriata, Li Keqiangip, Europami nunanut assigiinngitsunut tikeraarluni angalanini ullunik pingasunik sivisussuseqartussaq ullumi aallartippaa. Spaniamut ilaatigut tikeraassaaq, Spaniamiullu aningaasarsiornikkut ajornartorsiornermik qaangerniarnissaanut pilersaarutaannut tatiginnilluni oqariartuuteqarpoq, neriorsuuteqarlunilu Kina Spaniami suli aningaasaaliissuteqartarumaartoq.

Spaniap ikiorneqarnissani assut pisariaqartippaa. Aningaasarsiornikkut unittooqqavoq . Pisortanullu akiitsut qaffariarujussuarsimapput.

Arlallillu ernummatigivaat Spania, Irland aamma Grækenland assigalugit, aatsaat milliarderpassuarnik ikiorserneqarluni aningaasarsiornikkut ajornartorsiornerminik qaangiisinnaasoq.

Kina qallunaat aningaasaannik 10 trillioninik Europami aningaasarsiornikkut ajornartorsiortunut aningaasaliissuteqarsimavoq. Aningaasaliissutillu arlaatigut uterteqqinnissai soqutigisaralugit.

Taamaattumik Spania aningaasaqarnikkut ajalusoorluinnassappat Kinamut eqquinerluttussaavoq.

Spania EU-mi nunat aningaasarsiorfiit annersaasa tallimaraat, taamaattumillu aamma Europami kinguneqarluttussaavoq nunap aningaasaqarnera ajalusoorluinnassappat.

Europap Kina pisariaqartippaa, Kinallu aamma Europami aningaasarsiornerup patajaatsuunissaa pisariaqartillugu, taamaattumik Grækenlandi Kinamit siorna aamma ikiorserneqarpoq.

Li Keqiang, Kinap premieministerissaatut tullertut isigineqartoq, Spaniamut tikeraarnermi saniatigut Tysklandimut Tuluillu Nunaannut tikeraassaaq.