Kimiup saqqummersitsinera Københavnimut annguppoq

Saqqummersitsineq Essence, Nunat atlantikup avannaamiut illuutaanni Odensemiittumi saqqummersinneqaqqaartoq, Københavnimi Kalaallit Illuutaanni saqqummersinneqarluni ullumi ammaanersiorneqassaaq.

Kalaallit eqqumiitsuliortut 13-it - ilaatigut Mike Jacobsen, Buuti Pedersen aamma Naja Rosing-Asvid – saqqummersitsinermi Essencemi assilissanik, assiliartalersukkanik ilusilersukkanillu saqqummersitseqataapput. Eqqumiitsuliortullu tamarmik immikkut taaguut 'essens' (tangia imaluunniit pingaarnersaq) tunngavigalugu suliaqarsimapput.

- Soorlu assersuutigalugu qalipaatip tangia imaluunniit inuup immini suna pingaarnersarineraa aallaavigineqarpoq. Eqqumiitsuliortup nammineerluni sunarpiaq samminiarnerlugu toqqagassaraa. Tamannalu eqqumiitsulianik assigiinngisitaaqisunik kusanaqisunillu saqqummersitsinermik kinguneqarpoq, Lisbeth Karline, Kimiup siulersuisuini ilaasortaq, saqqummersitseqataasorlu, taama oqaluttuarpoq.

Essence Kalaallit Illuutaanni marsip 28-iata tungaanut saqqummersinneqassaaq. Tamatuma kingorna Sønderjyllandimi, Island Savalimmiunilu aamma saqqummersinneqassalluni.