Kimitsinikkut sinittutut pissuseqalersitaasut

”Isikkut toqqarlunga isiginnga”.Oqaatsit taakku tassaapput arnap Italiami pisiniarfissuarmi sulisup, kimitsinikkut sinittutut pissuseqalersitaareerluni, iterami eqqaamasinnaasai kingulliit.
Allattoq Louise M. Kleemann
marsip 25-at 2008 07:27

Taama pisoqarnerata nalaani angut arnamik taassuminnga sinittutut pissuseqalersitsisoq, aningaasivimmit aningaasanik isertunik naatsorsueqqissaarutaasumit 4.200 koruuninik tilleriarluni pisiniarfik qimappaa.

Italiamiut politiivisa tillituup atisarissaartup taassuma assingi tamanut saqqummiuteqqammerpaat, tassami Italiami illoqarfimmi Ancona-mi pisiniarfissuarmi aningaaserivimmilu taamaalioreersimammat.

Aningaaserivimmi, sulisut ilaannik kimitsinikkut sinittutut pissuseqalersitsinermigut 6.000 koruuninik tillissimasoq BBC-mit nalunaarutigineqarpoq.

Pisuni assigiinngitsuni marlunni ullup naanerani karsit imaat kisinneqartussanngormata tillinniarneq aatsaat paasineqarpoq. Assiliiviit alapernaarsuutit misissoreernerisigut qanorpiaq pisoqarsimanera sulisut aatsaat paasisimavaat.

Angut 40-t sinnerlugit ukioqassasoq politiit oqaatigaat, Indiamiuunngikkunilu Pakistamiuussasoq imaluunniit Afrikap avannaaneersuussasoq ilimagalugu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq