KIMIK KANUKOKA-p akiliisinnaajunnaartutut nalunaarutigaa
Østre Landsretip KIMIK A/S septembarip aallaaqqaataani, KANUKOKA-mut 17,2 million kruuninik ”kattuffimmit 1998-imi tillitatut” taasanik taarsiisussanngortillugu eqqartuuppaa. Aningaasat taakku septembarip ulluisa 15-ianni akilerneqareertussaagaluarput, sulili akilerneqarsimanngillat. Taamaammat KANUKOKA-p siulersuisuisa ippassaq ataatsimiinnerminni aalajangerpaat KIMIK A/S Nunatta Eqqartuussivianut akiliisinnaajunnaartutut nalunaarutigineqassasoq. Tamannalumi ullumikkut pivoq.
KANUKOKA-p taamaaliornermigut kommunit arfineq-pingasut ilungersunartumut inissippai, taakkumi KIMIK A/S-imit ineriartortinneqarsimasumik qarasaasiatigut, Winformatik-imik taaguutilimmik ingerlatsiveqarput. Sulilu KIMIK A/S-imit sullinneqarlutik.
KANUKOKA-p siulittaasua Søren Alaufesen siusinnerusukkit kommuninut pineqartunut nalunaarpoq, KIMIK A/S atorunnaarsinneqarsinnaasoq.
Søren Alaufesen KANUKOKA-p Ilulissani ataatsimeersuarnerani saqqummiinermini oqarpoq, KIMIK A/S-imit KANUKOKA-mut pissusilersuutaasoq ”eqqunngitsuliornerusoq akuerineqarsinnaanngitsoq”, taamaattumillu allatut iliortoqarsinnaasimanngitsoq.
Kingumut qivialaassagutta, suliaq pineqartoq 1997-imi aallartippoq, taamani KANUKOKA aalajangerpoq akileraartarnermut tunngasut pissutigalugit kommunit qarasaasialeriffia namminersortunngortinneqassasoq. Namminersortunngornerani KANUKOKA piginneqataassutit annersaannik piginnittuuvoq qarasaasialeriffimmilu sulisut piginneqataasinnaanissaat takorloorneqaraluarluni. Sulisulli namminneq KANUKOKA avaqqullugu qarasaasialeriffik KIMIK A/S pilersippaat.
Tamannalu eqqartuussisulersuunneqarmat, Nunatta Eqqartuussivia 2006-imi aalajangerpoq KIMIK A/S 8 million kruunit missaannittunik KANUKOKA-mut annaasaanut matussutissanik taarsiissasoq, tamannali KIMIK A/S-ip Østre Landsretimut ingerlateqqippaa. Østre Landsretip suliaq nalilersoreerlugu septemberip aallaqqaataani KANUKOKA ilalerpaa, KIMIK A/S-ilu akiliinissaanik piumasaqarfigalugu. Septembarip 15-iani KIMIK A/S akiliisimanngimmat, KANUKOKA Nunatta Eqqartuussivianut saaffiginnippoq, KIMIK A/S akiliisinnaajunnaartutut nalunaarutigalugu.
