Kanukokap Kimik IT-mik eqqartuussassanngortitsinerata inernera qaammatini arlaqartuni utaqqineqaqqaartariaqassaaq. Putsileqattaarnera pissutigalugu eqqartuusseqataasussap Nuummut tikissinnaannginnera, kingornalu eqqartuusseqataasussap suliamut attuumassuteqarpallaarnera, suliassap augustip qaammataanut kinguartinneqartariaqalerneranik kinguneqarpoq.
Kanukokap Kimik IT-mik eqqartuussassanngortitsinerani ullumikkut ulloq suliap ingerlanerani kingulliugallassaaq. Suliassaq augustimi aatsaat nangeqqissaaq.
Qarasaasialeriffiup Kimik IT Kanukokamit eqqartuussivilersuussaanera 2001-imili aallartippoq, kinguartitsisariaqarnerlu aappassaanik pilluni. Kinguartitsineq Kimik IT-p sulisuinut kamassaataavoq, tamatumuunali kinguartitsinermut peqqutaasoq Kimik IT-p nammineq pisuussutigaa.
Maanna suliap kinguartinneranut pissutaavoq eqqartuusseqataasussat ilaata suliamut attuumassuteqarnera. Pineqartoq taannaagami Kimik IT-p unammillertaata Kit A/S-ip, Kanukokamit pilersinneqarsimasup, pisortaata qatanngutaa.
Suliassap ulluni tallimani ingerlanneqartussatut naatsorsuussap ullunik marlunnik kinguaattoorfioreernera eqqartuussisuunerup Søren Søndergård Hansenip augustimut kinguartitsisariaqarneranut tunngaviuvoq.
Kanukokap suliassiissuteqarnermini tunngavilersuutigaa Kimik IT 90-ikkut qiteqqusimalerneranni Kanukokamit avissaarlutik namminersortunngornerat, taamaaliornerminni Kanukokap pilersaarutai tunngavigalugit. Kanukokap nammineerluni pilersaarutigereersimagaluarpaa qarasaasialeriffiup namminersortunngortinnissaa.
Kimik IT-mit oqaatigineqarpoq taamaaliornermi borgmesterinit siunnerfigineqartoq maliinnarsimallugu taamaattumillu piumasaralugit qarasaasiaqarfiup Kit A/S-ip matuneqarnissaa. Taakkuttaaq piumasaraat kommunit qarasaasiaqarfimmi suliassatigut kiffartuunneqarneranni Kanukokap akuliutinnginnissaa, taamalu piumasaraluguttaaq Kanukoka suliap aningaasartuutaanik akiliissasoq.
Suliap Nunatta Eqqartuussiviani ngerlanneqarnerani inatsisilerituut marluk Kanukokamik sullissisuusimasut ullumi killisiorneqartussaapput.