KIMIK akiliisussanngortinneqarpoq
Kommuneqarfiit kattuffiata KANUKOKA-p qarasaasiaqarfimmik KIMIK IT-mik eqqartuussivilersuussinera naammassisimalerpoq, Nunattalu Eqqartuussiviata naliliineratigut, KIMIK IT 8 million koruuninik akiliisussanngortinneqassaaq:
Eqqartuussisoqatigiit, tassa nunatta eqqartuussisuunera Søren Søndergård Hansen, eqqartuusseqataasartullu Ruth Lindhardt aamma Svend Hardenberg isumaqatigiipput, 8 million koruuninik, taakkulu erniaannik akiliisussanngortitsisoqassasoq. Tassa imaappoq: Suli eqqartuussuteqartoqanngilaq, eqqartuussuteqartoqassappalli suliap taama inernerneqarnissaa eqqartuussisoqatigiit inassutigaat.
Akiligassat 8 million koruunit saniatigut, suliap ingerlannerani aningaasartuutit 500.000 koruunit suliassiisumut, tassa kommuneqarfiit kattuffiannut, akilerneqartariaqartut eqqartuussisoqatigiinnit inassutigineqarpoq.
KIMIK IT-p pisortaanerata Ian Wennerfeldtip ajuusaarutigaa, taama inassuteqartoqarniarmat, oqarlunili pisariaqassappat suliaq Danmarkimi Østre Landsretimut ingerlateqqinniarlugu, tamannali aatsaat pisinnaassaaq, suliassanngorttnneqartut inuit qulingiluat taamaaliornissamut isumaqatigiissappata.
Eqqartuussineq ukioq manna maajip qaammataani aallarnerneqarpoq, taamanikkullu oqaatigineqaraluarpoq KIMIK IT akiliisinnaajunnaassagaluartoq, qarasaalialeriffimmilu aallarneeqataasut akiliisinnaajunnaassasut.
KIMIK IT-mili pisortaanerup Ian Wennerfeldtip taama inerniliinissaq piaarpallaarsoraa:
- Akiliisinnaajunnaassanersugut oqaatigisinnaanngilara, piaarpallaarpoq, sullitagulli eqqarsaatigalugit qanoq ilioriataarnissamik piareersimavugut, KIMIK IT-mi pisortaaneq oqarpoq.
KANUKOKA-p 12,5 million koruuninik taarsiisoqarnissaa piumasarisimagaluarpaa,
siulersuisunili siulittaasup tulliata aappaa, Nuup Kommuneani borgmesteri Agnethe Davidsen siulersuisut immikkut ittumik ullumi ataatsimeereersullu oqarpoq, eqqartuussisoqatigiit 8 million koruuninik erniaanillu taarsiisoqarnissaanut inassuteqarnerat iluaralugu.
KANUKOKA-p ukioq 2001-ip tungaanut annaasaqaatigisimasinnaasai tunngavigalugit aningaasanik amerlassusiliisoqarpoq, kommuneqarfiit kattuffiata ingerlatseqatigiiffik taamani pilersimmagu KIT A/S.
