Kim Leine nersornaasigaaqqippoq

Qallunaap atuakkiortup Kim Leinep atuakkiaa 'Profeterne i Evighedsfjorden' DR-ip atuakkanut nersornaasiuttagaanik nersornaaserneqarpoq.
Allattoq Elisa Isaksen
juunip 10-at 2013 08:33

Kim Leinep Nunatsinni ajoqersuiartortitsinerup oqaluttuarisaaneranik atuakkiariniagaanit pingasuusunit, atuakkiaa taanna siulleq, DR Romanpris-imik arfininngormat nersorniarneqarpoq. Tamatuma saniatigut Nunat Avannaamioqatigiit atuakkiortunut nersornaasiuttagaannik nersornaasigassatut innersuussaavoq.
 
Danmarkimi atuagaateqarfiit suleqatiginerisigut nersornaasiineq pivoq, tamatumani atuakkat arfinillit toqqarneqarput, atuartartullu atuakkialerituut klubbianni nuna tamakkerlugu atuagaateqarfinnit 50-ineersut, atuakkat atuarpaat oqallisigalugillu, tamatumalu kingorna atuakkialerituut klubbiineersut aalajangiisussat, atuagaq Profeterne fra Evighedsfjorden ajugaatippaat.
 
Aalajangiisussat atuagaq 'isumaliutigilluagaasutut suliarilluagaasutullu nalilerpaat - tassa pisimasunut piviusunut atatiinnarnagu, aammali oqaluttualiarineranut atatillugu. Atuakkami mikisualuit tamarmik eqqarsaatigilluagaapput, atuagarlu taamaattoq tiguartinnartuuvoq'.
 
Kim Leinep Nunatsinni pisimasuutitaminik atuakkiaasa atuagaq pingajoraat. Atuakkiortormi affarmik qallunaajullunilu affarmik norskiusoq Nuummi Tunumilu peqqissaasutut ukiuni 15-ini sulinermini Nunatsinnik pingaartitsisorujussuummat.
 
Aapakumik Maaria Magdalinamillu oqaluttuap Nunatsinni ajoqersuiartortitaqarnerup oqaluttuarisaaneranut tunngasunik atuakkanik marlunnik malitseqarnissaa, atuakkiortup takorloorpaa.
 
Nuummi ajoqersuiartortitsinerup atuutilerneranut tunngasoq aamma 1884-imi umiamik ilisimasassarsiorneq atuakkiariniarneqarput. Taakkuli utaqqisariaqassavavut, atuakkiaanimi tulliuttumi Finlandimi innuttaasut imminnut sorsuunneranni qallunaaq kiffaanngissuseqarniarluni sorsoqataasoq atuakkiarineqaqqaartussaammat.
 
Atuakkap nersornaaserneqarnera 25.000 koruuninik aningaasartaqarpoq.