Kim: Kinguariarnitsinnut Aleqa pissutaaqataavoq
- Nuanneq, tassa kinguaariit nikikkiartornerat malunnarsivoq, Siumup siulittaasua Kim Kielsen, qinersinerup inernera pillugu Qanoruumut taama oqarpoq.
Siumut sinnerlugu siullermeerluni qineqqusaartoq, Aki Mathilda Høegh Dam, 3467-inik taaguunneqarluni Folketingimut iserpoq.
Partiip siulittaasuata kinguariarsimanertik ilaatigut sassartitamik nutaaginnaanerannik tunngaveqarnerarpaa. Aammali:
- Taamaattorli aamma oqarusuppunga Aleqa Hammondi siumumut kingullermik sassarpoq qinerneqangaatsiarluni, taakkulu aamma qinersisigut nunatta qitornaanut malinnaallutik qinersisimapput, Kim Kielsen oqarpoq.
Taassuma Aki Mathilda Høegh Dam Aaja Chemnitz Larsenillu suleqatigiilluarnissaat imminnullu ilikkalertupallannissaat neriuutigaa, taamaattorli aamma Siumup Folketingimi suut pingaartillugit suliarissanerai taakkartorlugit.
- Nunanut allanut tunngassuteqartut, politiinut tunngasut, inuussutissarsiornermut tunngasut aamma nerisaqarnitsinnut tunngatillugu qulaajangassat, Kim Kielsen oqarpoq.
Siumup ministeriunermik qinersinissamini socialdemokraatit siulittaasuat Mette Frederiksen toqqassallugu qineqqusaarnerup aallartinnginneranili nalunaarutiginikuuaat.
